նախընտրելի դարձնելՕգոստոսի 23-ին, ժամը 21-ի սահմաններում, օպերատիվ կառավարման կենտրոնից ոստիկանության Արտաշատի բաժին հաղորդում էր ստացվել, որ Հովտաշեն գյուղի մի տնից գողություն են արել: Այս մասին հայտնում են Ոստիկանության լրատվության ծառայությունից։
Իրավապահները մեկնել էին դեպքի վայր: Պարզվել էր` ինչ-որ մեկը ննջասենյակից ոսկյա զարդեր էր գողացել: Տունը տակնուվրա արված չէր. ո՛չ դուռն էր վնասված, ո՛չ էլ պատուհանները:
Ձեռնարկված օպերատիվ-հետախուզական միջոցառումների արդյունքում քրեական հետախույզները պարզեցին, որ գողությունը կատարել է տանտիրուհու ազգականը` Երեւանի Նուբարաշեն համայնքում բնակվող անչափահաս մի աղջիկ:
Օգոստոսի 21-ին գտնվելով տուժողի տանը՝ նա օգտվել էր տանտերերի անուշադրությունից եւ ննջասենյակի պահարանից գողացել ոսկեղենը:
Կասկածվողը հրավիրվել է ոստիկանություն եւ խոստովանել կատարածը:
Հանգամանքները պարզվում են:
Քննությունը շարունակվում է:
