նախընտրելի դարձնելԿառավարությունն իր այսօրվա՝ հունիսի 6-ի նիտում որոշեց Երեւանի Աբովյան փողոց թիվ 3 հասցեում գտնվող «ԱՕԿՍ»-ի շենքը եւ հրակից հողամասը տրամադրել վարձակալության մրցութային եղանակով:
Շենքը վարձակալությամբ է տրվելու 10 տարի ժամկետով։ Գույքի ամսական նվազագույն վարձավճարը 15 մլն 450 հազար դրամ է լինելու։
Միաժամանակ հաշվի առնելով, որ նշված շենքի 49.8 քմ մակերեսով նկուղային տարածքը հանդիսանում է «Թիֆլիս» ՍՊԸ-ին սեփականության իրավունքով պատկանող քաղաք Երևան Աբովյան 3 շենք թիվ 1 շինություն հասցեին հարակից տարածք և վերջինս դիմել է նշված նկուղային տարածքը վարձակալելու խնդրանքով, նպատակահարմար է համարվել մրցութային եղանակով վարձակալության տրամադրել շենքի 1-ին, 2-րդ և 3-րդ հարկերի տարածքը՝ ընդհանուր 651.6քառ. մետր մակերեսով, իսկ նկուղային տարածքի ամսական վարձավճարի շուկայական արժեքի գնահատման աշխատանքների ավարտից հետո քննարկել վերջինս վարձակալության տրամադրելու հարցը:
Նշենք, որ այս անշարժ գույքը ընդգրկված է Երևան քաղաքի պատմության և մշակույթի անշարժ հուշարձանների պետական ցուցակում:
Մայիսի 25-ի կառավարության նիստում վարչապետ Նիկոլ Փաշինյանն անդրադարձել էր ԱՕԿՍ-ի շենքին։
«Եթե ՀՀ քաղաքացին իր երեխայի հետ գնա, մտնի ԱՕԿՍ-ի շենք, նախաճաշի ու դուրս գա, դա սրբապղծությո՞ւն է։ Բոլոր շենքերը մարդու համար են»,- ասել էր նա։ Գլխավոր դատախազ Աննա Վարդապետյանն էլ նշել էր, որ ԱՕԿՍ-ի շենքը պետք է դառնա պետությանը տնտեսական էֆեկտ առաջացնող անշարժ գույք։
Նշենք, որ այս շենքի հետ կապված դատական գործում ներգրավված էին նաև 2012-2016 թթ. ՀՀ մշակույթի նախարարի պաշտոնը զբաղեցրած Հասմիկ Պողոսյանը, որը, ըստ մեղադրանքի, օժանդակել է «Երևանի Պ.Չայկովսկու անվան միջնակարգ երաժշտական դպրոց» ՊՈԱԿ-ին անհատույց օգտագործման իրավունքով տրամադրված՝ Երևանի Կողբացի 36 հասցեում գտնվող հողամասից առանձնացված 300 քառակուսի մետր մակերեսով տարածքը արտակարգ և լիազոր դեսպան Ա.Ս.–ի (խմբ. Իսրայելում և ՌԴ–ում ՀՀ նախկին դեսպան Արմեն Սմբատյան) կազմակերպած ու ղեկավարած հանցավոր խմբի կողմից խարդախությամբ հափշտակելուն: Արդյունքում պետությանը պատճառվել է 100 մլն դրամի գույքային վնաս:
«Արտասահմանյան երկրների հետ մշակութային կապի և համագործակցության հայկական ընկերություն» ՀԿ-ի որոշմամբ հիմնադրված «ԱՕԿՍ» ՍՊԸ-ի 100 տոկոս բաժնեմասը 550 000 դոլարով ձևական գործարքի արդյունքում օտարել են օֆշորում՝ Բրիտանական Վիրջինյան կղզիներում գրանցված ընկերությանը։ Դրա տնօրենն է հանդիսացել Հասմիկ Պողոսյանի որդու կինը՝ Ֆրանչեսկա Կուտրուպին։
2023–ի սեպտեմբերի 9–ին ԱՕԿՍ–ի շենքի սեփականության իրավունքը փոխանցվեց Հայաստանի Հանրապետությանը։
