նախընտրելի դարձնելՀայոց ցեղասպանության ճանաչման հարցը Թուրքիայի պատասխանատվության հարցն է ողջ մարդկության առջեւ։ Այս մասին Ծիծեռնակաբերդի հուշահամալիրում լրագրողների հետ զրույցում նշել է Հայ ազգային կոնգրես կուսակցության վարչապետի թեկնածու Լեւոն Զուրաբյանը։
Մեկնաբանելով ՀԱԿ եւ ՀՀ առաջին նախագահ Տեր-Պետրոսյանի եւ ներկա իշխանությունների միջեւ մոտեցումների տարբերությունները՝ Զուրաբյանը նշել է, որ այն ժամանակ այդ հարցը չէր ներառվել արտաքին քաղաքականության օրակարգում, քանի որ այն ժամանակվա իշխանություններն այն համարում էին ցեղասպանության հիշողության եւ իրազեկման հարց։ ՀԱԿ ներկայացուցիչը հիշեցրել է, որ հենց այդ պատճառով է 1995թ․ կայացվել երկու կարեւոր որոշում՝ առաջին նախագահի հրամանագրով կառուցվել է Հայոց ցեղասպանության թանգարանը եւ անցկացվել է ցեղասպանությանը նվիրված մեծ համաժողով, որտեղ Տեր-Պետրոսյանը ելույթ է ունեցել՝ Հայոց ցեղասպանությունը որակելով որպես մարդկության դեմ գործված ծանր հանցագործություն։ «Ներկա իշխանությունները,- շարունակել է Զուրաբյանը,- ոտնձգություն են կատարում հիշողության նկատմամբ՝ ակնարկելով, թե արդյոք ցեղասպանություն ընդհանրապես գոյություն է ունեցել, արդյոք այն կարելի է այդպես անվանել, եւ արդյոք տեղի ունեցածը պետք է ուսումնասիրվի։ Սա մեզ համար անընդունելի է։ Մենք թույլ չենք տա, որ հիշողությունը ջնջվի, եւ իշխանությունները հենց դա են անում՝ կրկնելով բոլշեւիկների քաղաքականությունը, որոնք փորձեցին զրկել հայ ժողովրդին հիշողությունից»,- նշել է Զուրաբյանը։
Պատասխանելով այն հարցին, թե արդյոք պետք է այրվի թուրքական դրոշը, ՀԱԿ ներկայացուցիչը պատմեց իր կյանքից մի դրվագ. «1996թ․ մենք Ստամբուլում համաժողովի էինք։ Ադրբեջանցիները Բոսֆորի նեղուցում այրում էին հայկական դրոշը։ Դրոշ այրելը թուլության եւ պարտության նշան է։ Ես կնախընտրեի, որ այրվեին հայկական դրոշները, որովհետեւ դա անում են նրանք, ովքեր ավելի թույլ են։ Որպեսզի մենք լինեինք իրավիճակի տերը, եւ մենք տերն էինք»։
Զուրաբյանի խոսքով՝ հարցն արտաքին քաղաքականության ոլորտ տեղափոխելը լուրջ հետեւանքներ ունեցավ։ «Թուրքերը պատասխանեցին՝ առաջարկելով ստեղծել պատմաբանների հանձնաժողով՝ ուսումնասիրելու համար, թե արդյոք տեղի է ունեցել Հայոց ցեղասպանությունը։ Սա լուրջ սխալ էր, որը Հայաստանին դժվարին դրության մեջ դրեց։ Եթե դուք ընդունում եք հանձնաժողով ստեղծելու առաջարկը, ապա կասկածի տակ եք դնում այն եւ պատրաստ եք քննարկել փաստի իրականությունը։ Դա նման է նրան, որ Իսրայելը համաձայնի Իրանի հետ ստեղծել հանձնաժողով՝ Հոլոքոստն ուսումնասիրելու համար»,- նշել է Զուրաբյանը՝ ավելացնլով, որ մերժումը հանգեցրեց Ցյուրիխի գործընթացի ձախողման հայտնի հետեւանքներին։ Նրա խոսքով՝ պետության կողմից հարցը արտաքին քաղաքականության մեջ մտցնելու ցանկացած փորձ արժեզրկում է Ցեղասպանությունը եւ այն դարձնում երկկողմ բանակցությունների առարկա, չնայած այն հանգամանքին, որ սա Թուրքիայի պատասխանատվության հարց է ամբողջ աշխարհի առջեւ։
