Սյունիքում տեղի ունեցած ավտոբուսի վթարի հետևանքով զոհերի և տուժածների թիվն աճել է։ Այս պահին նախնական տվյալներով կա 4 զոհ և 9 տուժած: հայտնում է ՀՀ ՆԳՆ-ն։
Դեպքի վայրում աշխատանքները շարունակվում են:
Հիշեցնենք, որ ապրիլի 27-ին՝ ժամը 17:27-ին Ճգնաժամային կառավարման ազգային կենտրոն ահազանգ էր ստացվել, որ Սյունիքի մարզի Վերին Խոտանան գյուղի մոտակայքում ավտոբուսը դուրս է եկել ավտոճանապարհի երթևեկելի հատվածից և գլորվել ձորը:
Վերին Խոտանանի վարչական շրջանի ղեկավար Ռաֆայել Գրիգորյանը NEWS.am-ին հայտնեց, որ ավտոբուսը Երեւանից Իրան էր վերադառնում, ուղեւորները իրանցիներ են: Նրա խոսքով՝ ըստ տեղեկությունների ավտոբուսը արգելակների հետ է խնդիր ունեցել:
Գրիգորյանը նշեց, որ վիրավորները տեղափոխվել են Կապանի բժշկական կենտրոն, վթարի վայրում փրկարարները դեռ աշխատում են:
