Հայաստանը շատ ընկերներ ունի, եւ մենք ցանկանում ենք միասին աջակցել նրան, որ առաջիկա խորհրդարանական ընտրությունները լինեն ազատ եւ արդար: Այդ մասին լրագրողների հետ զրույցում ասաց Հայաստանում ԱՄՆ արտակարգ եւ լիազոր դեսպան Ջոն Հեֆերնը:
Պատասխանոելով հարցին, թե նախընտրական արշավի ժամանակ ինչ խնդիրներ են նկատվել, ամերիկացի դիվանագետն ասաց. «Մենք փորձում ենք լավատես լինել եւ տեսնել լուսավոր կողմը»: Նրա խոսքերով` ընտրական հանձնաժողովների անդամների համար թրեյնինգները շատ կարեւոր են, սակայն առավել կարեւոր է իրավապահ մարմինների, քաղաքական կուսակացությունների, ընդդիմության քաղաքական կամքը:
Ինչպես նշեց դեսպանը, «վերջին շաբաթներին մենք տեսնում ենք քաղաքական կամքի դրսեւորում», ինչն արտահայտվում է պետական այրերի հայտարարություններում: Մասնավորապես, դեսպանը նշեց իշխանությունների` ընտրակաշառքի դեմ պայքարի եւ ընտրողների ձայների գնման վերաբերյալ հայտնողներին պաշտպանելու վճռականության մասին:
Դեսպանը նաեւ կարեւորեց ընտրությունների մոնիթորինգին դիտորդների մեծ թվով մասնակցությունը: «Կան շատ դրական պահեր:
Սակայն կան նաեւ մտահոգուոթյուն հարուցող փաստեր»,-արձանագրեց դիվանագետը: Ըստ նրա` խոսքը կուսակցությունների կողմից հանրահավքների անցկացման հարցում ոչ հավասար վերաբերմունքն է եւ վարչական ռեսուրսի օգտագործումը: