Ընթացիկ տարվա մայիսի 6-ին կայացած խորհրդարանական ընտրությունները բոլոր նախորդներից ժողովրդավարական են եղել: Այդ մասին հայտարարել է ԵԱՀԿ երեւանյան գրասենյակի ղեկավար, դեսպան Անդրեյ Սորոկինն այսօր` հոկտեմբերի 22-ին կայացած մամուլի ասուլիսում, որն ուղղված էր ազատ, թափանցիկ եւ ժողովրդավարական ընտրություններ անցկացնելու ծրագրի աջակցությանը: Հիշեցնենք, որ ծրագիրը ֆինանսավորվում է ԵՄ-ի եւ իրականացվում` ԵԱՀԿ-ի կողմից: Ծրագրի կատարման համար առանձնացվել է 1,7 միլիոն եվրո: Խոսքը 2012 եւ 2013 թթ. ընտրություններին աջակցելու մասին է:
Ըստ նրա` Հայաստանում խորհրդարանական ընտրությունների արդյունքում իրենց զեկույցում ԵԱՀԿ ԺՀՄԻԳ-ի ներկայացուցիչները հիմնականում ուշադրություն են դարձրել ընտրությունների ինստիտուտի նկատմամբ հանրության վստահության բացակայությանը: Դեսպան Անդրեյ Սորոկինը հիշեցրել է, որ ԵՄ-ի եւ ԵԱՀԿ-ի գործողություններն ուղղված են տեխնիկական մասի կատարելագործմանը: Պատասխանելով ընտրակաշառքների բաժանման մասին հարցին` դեսպանը հիշեցրել է, որ ընտրությունների նախօրեին Գլխավոր դատախազությունը հանդես է եկել հայտարարությամբ, որ նման գործարքի մասին հաղորդած անձինք ազատվում են պատասխանատվությունից:
Քվեարկության ընթացքում բացահայտված որոշ խախտումների վերաբերյալ հարցը, մասնավորապես, ժամանակավոր կնիքների հետ կապված խնդիրները մեկնաբանել է պատվիրակության ղեկավարի տեղակալ Վիլյամ Հենանը: Ըստ նրա` որոշ խախտումներ եղել են, սակայն ընդհանուր առմամբ Հայաստանում ընտրությունների գործընթացը բարելավվել է: