Իրան-Հայաստան երկաթգծի բեռների պոտենցիալ բազան արդեն հաշվարկված է: Այդ մասին այսօր՝ դեկտեմբերի 21-ին NEWS.am-ի թղթակցին հայտնել է «Հարավկովկասյան երկաթուղի» ՓԲԸ-ի գլխավոր տնօրեն Վիկտոր Ռեբեցը:
Հետազոտությունն իրականացրել է ՌԴ Տնտեսագիտական բարձրագույն դպրոցի տրանսպորտային տնտեսության եւ տրանսպորտային քաղաքականության ինստիտուտը:
2012թ. ընկերությունը բեռնափոխադրումների հնարավոր պատվիրատուների հետ չի հանդիպել, սակայն հետազոտությունում առկա տեղեկատվությունը հստակ է եւ հասանելի:
Հիշեցնենք, որ 2012թ. նոյեմբերին Հայաստանում էր Amber Capital Investment Management ներդրումային ընկերության գլխավոր տնօրեն Ժոզեֆ Ուգուրլյանը: Նրա հետ հանդիպման ժամանակ Հայաստանի տրանսպորտի նախարար Գագիկ Բեգլարյանը հայտարարել էր նախագիծը շտապ սկսելու մասին: Այնուամենայնիվ, նշել է Վ. Ռեբեցը, ՀԿԵ-ն Amber Capital-ի ներկայացուցիչների հետ ոչ մի հանդիպում չի անցկացրել:
«Մենք այդ ուղղությունը շատ կարեւոր ենք համարում, ընդ որում Հայաստանից եւ Ադրբեջանից Իրան ուղղությունները չեն մրցակցում միմյանց հետ: Չնայած որ երկուսի վերջնական կետն էլ նույնն է՝ Պարսից ծոցը, սակայն հայկական ուղղությունը կարող է սպասարկել նաեւ սեւծովյան նավահանգիստների Ռուսաստանի հարավային շրջանների ուղղությունը», – նշել է Վ. Ռեբեցը:
Նշենք, որ Իրան-Հայաստան երկաթգիծը պետք է դառնա Նախիջեւանի երկաթգծային ճյուղի այլընտրանքը, որը չի գործում 1990թ.-ից: Ըստ 2009թ. գնահատումների՝ ճյուղի ընդհանուր երկարությունը կկազմի 470 կմ, որից 60 կմ-ը՝ Իրանի տարածքում:
Հայաստանում նոր ուղղությունը կարող է ապահովել լեռնահանքային ձեռնարկությունների երկաթգծային բեռնափոխադրումները:
«ՀԿԵ»-ն «Ռուսական երկաթուղի» ԲԲԸ-ի 100%-անոց դուստր ձեռնարկությունն է եւ 2008թ.-ից զբաղվում է Հայաստանի երկաթուղիների կոնցեսիոն կառավարմամբ: