2013 թվականը նշանավորվեց ֆրանս-հայկական բարեկամության եւ բոլոր ասպարեզներում մեր համագործակցության խորացմամբ: Այս մասին NEWS.am-ի թղթակցի հետ զրույցում նշեց Հայաստանում Ֆրանսիայի դեսպան Անրի Ռենոն՝ գնահատելով 2013-ին երկկողմ հարաբերություններում ձեռքբերումները:
Նրա խոսքով՝ բավական է միայն հիշատակել անցնող տարվա հոկտեմբերի 1-ին Հայաստանի նախագահ Սերժ Սարգսյանի Փարիզ կատարած այցը, մի քանի օր անց, Վալանսում երկու երկրների ավելի քան 50 ՏԻՄ ներկայացուցիչների համախմբած ֆրանս-հայկական ապակենտրոնացված համագործակցության 2-րդ համաժողովը, Մարսելի սենատոր-քաղաքապետի եւ նրա գլխավորած պատվիրակության եւ Սպիտակի երկրաշարժի 25-րդ տարելիցի առիթով Ֆրանսիայի Ազգային ժողովի բարեկամության պատգամավորական խմբի այցերը:
«Տնտեսական առումով, մենք կուտակային կենսաթոշակային ֆոնդերի կառավարման Crédit agricole եւ Société général e ֆրանսիական բանկերի ընդհանուր մասնաճյուղ AMUNDI-ի Հայաստան գալու նախաշեմին ենք: Ինչ վերաբերում է Carrefour-ին, ապա տարվում են աշխատանքներ արդեն 2014-ին գործունեություն ծավալելու ուղղությամբ»,-նշել է դեսպանը:
Նա նաեւ նշել է, որ Զարգացման ֆրանսիական գործակալության եւ Ազգային հիփոթեքային ընկերության (Երեւան) միջեւ դեկտեմբերի 17-ին Փարիզում ստորագրված 10 միլիոն եվրոյի վարկային պայմանագիրն էլ ավելի կխթանի երկու երկրների տնտեսական համագործակցությունը:
«Վերջապես, Ֆրանսիայի նախագահ Օլանդի՝ 2014-ին նախատեսված Հայաստան պետական այցի մասին օրերս արած հայտարարությունը պսակեց անցնող 2013 թվականը եւ նոր հեռանկարներ բացեց երկխոսության համար»,-ընդգծել է Ռենոն:
