«ԱրմենՏել»-ը մեկ տարում կարող է IP հեռուստատեսությանը միացնել իր լայնաշերտ հասանելիության (ԼՇՀ) բաժանորդների 30%-ին: Այս մասին ապրիլի 17-ին Երեւանում IPTV ծառայության շնորհանդեսի ժամանակ լրագրողներին հայտնել է «ԱրմենՏել»-ի (Beeline բրենդ) գլխավոր տնօրեն Անդրեյ Պյատախինը: Ծառայությունը տրամադրվում է ռուսական SPB TV ընկերության պլատֆորմի հիման վրա:
«Իհարկե մենք միակը չենք, ունենք հարգարժան մրցակիցներ, որոնք մեզ ստիպում են ավելի արագ քայլել: Հատուկ ցանկանում եմ ընդգծել, որ ծառայությունը միայն Երեւանի համար չէ, նշանակում է՝ մարզերում հասանելի կդառնան այն ալիքները, որոնք այժմ ծածկույթից դուրս են», - նշել է Պյատախինը:
SPB TV ընկերության գլխավոր տնօրեն Կիրիլ Ֆիլիպովը վստահեցրել է, որ 50 հեռուստաալիքներ պարունակող փաթեթում ընդգրկված են Հայաստանի ամենահայտնի ալիքները: «Մենք բավական երկար ենք ուսումնասիրել Հայաստանի շուկան եւ հասկացել, որ կան մի քանի ալիքներ, որոնք այստեղ ամենահետաքրքիրն են, հիմնականում դրանք լրատվական, մարզական, ընտանեկան հաղորդումներ ունեցողներն են», – ասել է նա:
Բազային փաթեթի ամսական արժեքն է 3 հազար դրամ, այն հասանելի կլինի ինչպես HDMI ունեցող հեռուստացույցների համար, այնպես էլ համարժեքի առկայության դեպքում:
«ԱրմենՏել»-ը եւ SPB TV-ն կշարունակեն նաեւ բանակցությունները բջջային սարքերում հեռուստատեսությունը ներդնելու շուրջ: «Մեր լուծումը թույլ է տալիս դա անել, քանի որ ընդգրկում է ամեն ինչ` եւ ժամանակակից սմարթ TV-ն, եւ շատ հին հեռախոսները, որոնք չեն կարողանում բջջային TV ընդունել», - հավելել է Ֆիլիպովը:
Հիշեցնենք, որ 2013 թ. վերջին «ԱրմենՏել»-ի ԼՇՀ բաժանորդների թիվը կազմել է 150 հազար: