Հայաստանը եւ Լիտվան մտադիր են խորացնել հարաբերությունները պաշտպանական ոլորտում: Այս մասին, այսօր՝ ապրիլի 23-ին, Լիտվայի պաշտպանության նախարար Յուոզաս Օլեկասի հետ համատեղ ասուլիսի ժամանակ հայտարարել է Հայաստանի պաշտպանության նախարար Սեյրան Օհանյանը:
Օհանյանը նշել է, որ երկու երկրների ՊՆ-ների միջեւ բարձր մակարդակով զարգանում է երկխոսությունը՝ հիմնված փոխգործակցության պատրաստակամության վրա: Կայացած բանակցությունները Սեյրան Օհանյանը արդյունավետ է համարել: Հանդիպման ընթացքում քննարկվել են երկկողմ համագործակցության, տարածաշրջանային եւ միջազգային նշանակության տարբեր հարցեր:
Նախարարի խոսքով՝ կողմերը համաձայնել են, որ անվտանգության ոլորտի հարցերը լուծելիս անհրաժեշտ է հետեւել ուժի չկիրառման միջազգային սկզբունքներին: Նախարարը նաեւ ընդգծել է, որ կողմերը պայմանավորվել են զարգացնել հարաբերությունները պաշտպանության ոլորտում:
Իր հերթին Լիտվայի պաշտպանության նախարարն ասել է, որ իր երկիրը կարեւորում է «Արեւելյան գործընկերության» ծրագրի երկրների հետ հարաբերությունների զարգացումը: Լիտվական կողմը բարձր է գնահատել Հայաստանի մասնակցությունը միջազգային ռազմական առաքելություններին:
Լուսանկարը Արսեն Սարգսյանի/NEWS.am