Էլեկտրաէներգիայի թանկացման դեմ պայքարող քաղաքացիները կատարեցին իրենց սպառնալիքը եւ փակեցին Սարյան փողոցը՝ այդ կերպ արտահայտելով իրենց բողոքը Հանրային ծառայությունները կարգավորող հանձնաժողովի նիստին իրենց մասնակցությունն արգելելու կապակցությամբ:
Ոստիկանները մի մասին հրելով դուրս բերեցին փողոցից, ակտիվիստների մի քանիսին հաջողվեց կրկին ճեղքել պատը եւ նստել փողոցում։
Այս պահին շարունակվում են բախումներն ու քաշքշուկները ոստիկանների եւ ակտիվիստների միջեւ: Ոստիկաններին միացել են լրացուցիչ ուժեր՝ կարմիրբերետավորներ: ակտիվիստներն անընդհատ նստում են փողոցի տարբեր հատվածներում, ոստիկանները նրանց քաշքշելով հեռացնում են։ Երեւանի փոխոստիկանապետ Վալերի Օսիպյանը հրահանգեց ոչ մեկին բերման չենթարկել, պարզապես հեռացնել փողոցից:
Նշենք, որ ԱԺ «Ժառանգություն» խմբակցության պատգամավոր Զարուհի Փոստանջյանն ակցիային մասնակցում է իր երկու մանկահասակ երեխաների հետ: Նա մտավ բազմության մեջ եւ գոռում էր ոստիկանների վրա՝ պահանջելով ուժ չգործադրել քաղաքացիների նկատմամբ: Մի պահ նա նույնպես հայտնվել էր ոստիկանական շղթայի մեջ:
Հիշեցնենք, որ ակտիվիստները պահանջում են թույլ տալ իրենց մասնակցել այս պահին ընթացող նիստին, որի ժամանակ քննարկվում է էլեկտրաէներգիայի թանկացման հարցը, սակայն նրանց թույլ չեն տալիս ներս մտնել՝ պատճառաբանելով, որ դահլիճում տեղ չկա:
Լուսանկարը՝ Արսեն Սարգսյանի/NEWS.am