Եթե ապացուցեն, որ Դոնեցկում մալազիական ինքնաթիռի վթարի ետեւում ռուսամետ ակտիվիստներն են կանգնած, ապա Ուկրաինայում իրավիճակի ապակայունացման մեղքը Ռուսաստանինն է, հայտարարել է Բրիտանիայի վարչապետ Դեւիդ Քեմերոնը «The Sunday Times»-ին տված հարցազրույցում:
«Եթե այդպես է, ապա մենք պետք է հստակ պատկերացնենք, թե ինչ է դա նշանակում. սա արդյունքն է նրա, որ Ռուսաստանն ապակայունացնում է ինքնիշխան պետություն, խախտում է տարածքային ամբողջականությունն, աջակցում զինված ավազակներին, վարժեցնում ու զինում նրանց»,- հայտարարել է Քեմերոնը: Նրա խոսքով՝ Եվրամիությունն ու Արեւմուտքը պետք է օգտագործեն իրենց «իշխանությունն, ազդեցությունն ու ռեսուրսները», որպեսզի փոխեն Ռուսաստանի հանդեպ մոտեցումը, հաղորդում է BBC-ի ռուսական ծառայությունը:
Դրա հետ մեկտեղ, նշել է Քեմերոնը, ԵՄ շատ երկրներ շատ դանդաղ են արձագանքում Մոսկվայի գործողություններին:
«Մենք երբեմն մեզ այնպես ենք դրսեւորում, կարծես մենք Ռուսաստանի կարիքն ավելի շատ ունենք, քան նա մեր»,- ասել է բրիտանացի վարչապետը:
Բրիտանիայի պաշտպանության նախարար Մայքլ Ֆալոնի հրապարակված հարցազրույցում խոսվում է Մոսկվայի դեմ հնարավոր նոր պատժամիջոցների մասին, որոնք «Ռուսաստանին կկտրեն Արեւմուտքից»:
«Եթե Ռուսաստանը գլխավոր մեղավորն է, մենք կարող ենք հետագա միջոցներ ձեռնարկել նրա դեմ եւ հասկացնել, որ պատերազմի նման հովանավորումը միանգամայն անընդունելի է»,- հայտարարել է բրիտանացի նախարարը: