«Իսլամական պետություն» խմբավորման զինյալների կողմից Իրաքի քրիստոնյա բնակչության հետապնդումը ցույց է տալիս դրա հանցավոր բնույթը եւ բացառում դրա շարքերում այսպես կոչված ապստամբների ներկայության հնարավորությունը: Նման հայտարարությամբ հանդես է եկել Իրաքի գործող վարչապետ Նուրի ալ-Մալիքին:
«Այն, ինչ «Իսլամական պետության» զինյալները Նայվանա նահանգում անում են մեր քրիստոնյա քաղաքացիների դեմ՝ իրենց վերահսկողության տակ գտնվող շրջանների եկեղեցիների կործանում, աղոթատեղիների վրա հարձակում եւ այլն, առանց որեւէ կասկածի բացահայտում է այդ խմբավորման հանցավոր բնույթը, որը սպառնում է ամբողջ մարդկությանը»,- վարչապետի խոսքերն է մեջբերում ԻՏԱՌ-ՏԱՍՍ-ը:
Վարչապետը նաեւ դիմել է միջազգային հանրությանը՝ կոչ անելով միավորվել այդ սպառնալիքին դիմակայելու համար:
Ինչպես հաղորդվել է, Մոսուլը գրաված «Իսլամական պետության» զինյալները քրիստոնյաներին սպառնում են սպանել, եթե նրանք չհրաժարվեն իրենց կրոնից, «հետապնդումից պաշտպանության հարկ» չվճարեն կամ չլքեն քաղաքը:
