Ընթացիկ տարվա վերջին Երեւանում նախատեսվում է տնտեսական համագործակցության հարցերով հայ-ուկրաինական միջկառավարական հանձնաժողովի նիստ անցկացնել: Այդ մասին այսօր՝ հուլիսի 22-ին, մամուլի ասուլիսին հայտարարել է Հայաստանում Ուկրաինայի արտակարգ եւ լիազոր դեսպան Իվան Կուխտան
Անդրադառնալով ԵԱՏՀ-ին Հայաստանի անդամակցության հեռանկարներին եւ ԵՄ-ի հետ Ուկրաինայի ասոցացման մասին համաձայնագրին, դեսպանն ընդգծեց, որ կողմերը շահագրգռված են համագործակցության զարգացման ուղղությամբ եւ միջկառավարական հանձնաժողովի հանդիպման ընթացքում մտադիր են ճշգրտել ծագող հարցերի շուրջ մանրամասներն եւ դրանց լուծման ուղիները:
Ուկրաինացի դիվանագետը հիշեցրեց, որ Ուկրաինայից Հայաստան է ներկրվում մետաղ, գյուղատնտեսական արտադրանք՝ ցորեն, գարի, չոր կաթ, սերուցքային եւ արեւածաղկի յուղեր, օղի: Իր հերթին, վերջին մի քանի տարիների ընթացքում Կիեւում հայկական կոնյակի մի շարք խանութներ են բացվել, այս խմիչքը մեծ հեղինակություն է վայելում, Հայաստանից արտահանվում են նաեւ ձկնային արտադրատեսակներ, ծիրան: «20 տարվա ընթացքում շուկան կայացավ: Չեմ կարծում, որ այդ ապրանքներն հենց այնպես կարող են դուրս շպրտվել», - նշեց դեսպանը: