Արմավիրի քաղաքապետ Ռուբեն Խլղաթյանի մեքենան այսօր՝ հուլիսի 22-ի, վաղ առավոտյան ԼՂՀ Քաշաթաղի հյուսիսային մասում՝ Վաղազին գյուղի մոտ, պայթել է ոչ թե ականապատ տարածքում, այլ ճանապարհին մոտ. այս պահին իրավապահները փորձում են հասկանալ, թե ականն ինչպես է հայտնվել այդ հատվածում:
NEWS.am-ի տեղեկություններով՝ մեքենայի մեջ եղել են 5 ուղեւորներ: Ռուբեն Խլղաթյանի հետ եղել է նաեւ եղբայրը, որը, բարեբախտաբար, ոչ մի վնասվածք չի ստացել:
Քաշաթաղի վարչակազմի ղեկավարի աշխատակազմի ղեկավարը NEWS.am-ի հետ զրույցում հերքեց տարածված տեղեկությունները, թե Արմավիրի քաղաքապետը Քաշաթաղ էր գնացել որսի:
«Նախ Արմավիրի քաղաքապետի անունն առաջին անգամ եմ լսում, էսքան ժամանակ մեզ մոտ չի եկել: Ո՞րս, դժվար որսի եկած լինեն, որովհետեւ մեզ մոտ որսն արգելված է, եւ գրեթե ոչ մեկն էլ որսի համար մեր շրջան չի գալիս»,- ասաց նա:
Մինչդեռ հիվանդանոցում հավաքված մարդիկ NEWS.am-ին հայտնեցին, որ Արմավիրի քաղաքապետը որսի էր գնացել, դեպքն էլ տեղի է ունեցել հենց որսի համար նախատեսված տարածքում։
Նշենք, որ ականի պայթյունից վիրավորվել են 3 ուղեւոր, նրանք այս պահին գտնվում են վերակենդանացման բաժանմունքում:
Հիշեցնենք, որ դեպքը տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է: Վթարի հետեւանքով վարորդը տեղում զոհվել է, իսկ ուղեւորներ Ռուբեն Խլղաթյանը, Արթուր Բաղդասարյանը եւ Գառնիկ Ավետիսյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երեւանի «Էրեբունի» բժշկական կենտրոն:
