Իրաքի խորհրդարանը երկրի նոր նախագահ է ընտրել ազգությամբ քուրդ քաղաքական գործիչ Ֆուադ Մասումին:
Սա արդեն քաղաքական կարեւորագույն երկրորդ պաշտոնն էր, որի թեկնածուի հարցում պետք է կողմնորոշվեին իրաքցիները նոր իշխանություններ ձեւավորելիս: Նախորդ շաբաթ խորհրդարանի խոսնակ էր ընտրվել սուննիական դաշինքի ներկայացուցիչ Սալիմ Ջաուրին, հայտնում է BBC-ի ռուսական ծառայությունը:
Իրաքցի քաղաքական գործիչները փորձում են կառավարություն ձեւավորել արմատական իսլամիստների ու սուննի գրոհայինների դաժան ճնշման եւ սպառնալիքների պայմաններում:
Մինչեւ օգոստոսի կեսերը կողմերը պետք է որոշեն շիաների ներկայացուցչին, որը կզբաղեցնի վարչապետի պաշտոնը:
Գործող վարչապետ Նուրի Ալ Մալիքին հայտարարել է, որ ինքը ցանկանում է պահպանել պաշտոնը՝ չնայած հրաժարականի պահանջին, որը հնչում է ինչպես երկրի ներսում, այնպես էլ դրա սահմաններից դուրս: