Հալեպում Սաքոն ավտովերանորոգման բիզնես ուներ, որտեղ արդեն 15 մարդ էր աշխատում: Հիմա հալեպահայը փոքրիկ կրպակում ֆալաֆել եւ շաուրմա է վաճառում:
Ըստ «The Christian Science Monitor»-ի, նա նույն բջջայինն ունի՝ հին սմարթֆոն, որը գնել է Հալեպում սիրիական հակամարտությունը սկսվելուց առաջ, որը ոտքից գլուխ շրջեց նախկինում հաջողակ այս գործարարի կյանքը: Դրանում լուսանկարներ կան, որոնցում պատկերված են վաղուց անցած կյանքը, լավ կահավորված տանը կեցվածք ընդունած սիրիահայերի մեծ, երջանիկ ընտանիքը, որը չէր էլ կասկածում, թե ինչ է տեղի ունենալու:
Նրա խոսքով, զգալի գումար էր տնտեսել, որը բավական կլիներ Հալեպում 4 բնակարան եւ 2 ավտոմեքենա գնելու, ինչպես նաեւ քաղաքի թանկարժեք վայրերում կանոնավոր կերպով ճաշելու համար: Սակայն պատերազմը հարված հասցրեց նրա բիզնեսին՝ ստիպելով կնոջ հետ Երեւան փախչել, ուր տարիներ առաջ ուղարկել էր որդուն՝ դեղագործություն ուսանելու համար:
Հիմա նա քաղաքի կենտրոնում փոքրիկ կրպակ ունի, որտեղ ֆալաֆել եւ շաուրմա է պատրաստում, իսկ նրա կինը՝ նախկին բժիշկ, ղեկավարում է հարեւանությամբ գտնվող կրպակը: Այստեղ ապրում են մեկ ննջասենյակ ունեցող բնակարանում, ընտանիքի մի քանի այլ անդամների հետ միասին: Այլեւս չկան լավ ավտոմեքենաներ, ռեստորաններ, վարձու աշխատողներ: «Այդ նման է նրան, կարծես թագավորական կենսակերպից անցել ես գնչուական կյանքի»,- ասում է սիրիահայը:
Սաքոն եւ նրա կինը, ով նույնպես 60 տարեկան է, այն 10 հազար հայերից են, ովքեր Երեւանում ապաստան են փնտրում:
