Թուրքիայի վարչապետ Ռեջեփ Թայիփ Էրդողանը կվերադարձնի մրցանակը, որը ստացել է ամերիկա-հրեական կազմակերպության կողմից 2004թ.-ին: Կազմակերպությունը նախկինում խնդրել էր Էրդողանին վերադարձնել մրցանակը Գազայի հակամարտության վերաբերյալ Էրդողանի մեկնաբանություններից հետո: Այդ մասին հաղորդում է ամերիկյան «ABC» հեռուստաալիքի կայքը՝ վկայակոչելով «Associated Press» գործակալությանը:
ԱՄՆ-ում Թուրքիայի դեսպան Սերդար Կիլիչն Էրդողանի անունից գրել է Ամերիկայի հրեական կոնգրեսի նախագահ Ջեք Ռոզենին: Դեսպանը նշել է, որ Էրդողանն ուրախ կլինի վերադարձնել մրցանակը Գազայում Իսրայելի գործողությունների պատճառով, որոնք ընդունել է Ամերիկայի հրեական կոնգրեսի արդի ղեկավարությունը Գազայի հատվածում խաղաղ բնակիչների վրա վերջին հարձակումների կապակցությամբ»:
Ինչպես նախկինում հաղորդում էր NEWS.am-ը, ԱՄՆ-ի հրեական կազմակերպությունը պահանջել է Թուրքիայի վարչապետ Ռեջեփ Թայիփ Էրդողանից վերադարձնել իր կողմից 10 տարի առաջ ստացած մրցանակը՝ կապված նրա վերջին գնահատականների հետ Գազայի հատվածում Իսրայելի գործողությունների վերաբերյալ: Ամերիկայի հրեական կոնգրեսի նախագահ Ջեք Ռոզենը թուրք վարչապետին անվանել է «աշխարհում թերեւս ամենավտանգավոր հակաիսրայելական առաջնորդ» եւ մեղադրել, որ նա «վտանգավոր ճարտասանություն է կիրառում քաղաքական նպատակներով եւ թուրք հասարակությանը հրեաների նկատմամբ բռնության է դրդում»: