Թուրքիան նախագահ Թայիփ Էրդողանի օրոք վերածվում է «մռայլ բռնապետության»։ Այս մասին իր թվիթերյան էջում գրել է Իսրայելի վարչապետ Բենիամին Նեթանյահուն։ Այսպես նա պատասխանել է Թուրքիայի առաջնորդի կողմից քննադատությանը հուլիսի 19–ին Կնեսեթի (Իսրայելի խորհրդարան) կողմից ընդունված օրենքին Իսրայել պետության հրեական բնույթի մասին։
«Թուրքիան նախագահ Թայիփ Էրդողանի կառավարման օրոք վերածվում է մռայլ բռնապետության, Իսրայելը հստակ հանձնառու է իր քաղաքացիների հավասարության իրավունքներին ինչպես մինչեւ օրենքի ընդունումը, այնպես էլ դրանից հետո։ Էրդողանը սպանել է սիրիացիներին եւ քրդերին, ինչպես նաեւ բանտերն է ուղարկել իր տասնյակ հազարավոր համաքաղաքացիների»,–նշել է Նեթանյահուն՝ շեշտելով, որ Իսրայելի ազգային բնույթի մասին օրենքի վրա Էրդողանի հարձակումները միայն զարդարում են փաստաթուղթը։
Ավելի վաղ՝ երեքշաբթի Էրդողանը հայտարարել է, որ նոր իսրայելական օրենքը կոչված է էլ ավելի նեղել եւ մեկուսացնել պաղեստինցիներին։ Բացի այդ, նա նշել էր, որ օրենքի ընդունումը ցույց է տալիս, որ Իսրայելը ամենասիոնիստական, ֆաշիստական եւ ռասիստական երկիրն է։ Թուրքիայի նախագահի խոսքով՝ Հիտլերի հոգին վերակենդանացել է որոշ իսրայելական պաշտոնյաների մեջ, փոխանցում է ՏԱՍՍ–ը։
