Թուրքիայի արտաքին գործերի նախարարությունը հաստատել է տեղեկությունն այն մասին, որ գերատեսչությունը Ստամբուլում Իսրայելի հյուպատոս Յոզեֆ Լեֆի Սֆարիին խորհուրդ է տվել ժամանակավորապես լքել երկիրը: Այս մասին չորեքշաբթի օրը մի խումբ լրագրողներին հայտնել էր աղբյուրը Թուքիայի ԱԳՆ-ում, փոխանցում է «ՏԱՍՍ»-ը:
«Այո, ես հաստատում եմ», - ասել է աղբյուրը՝ պատասխանելով լրագրողների հարցին՝ արդյոք նման առաջարկություն իսկապես ուղարկվել է:
Ավելի վաղ՝ երեքշաբթի օրը, Թուրքիայում Իսրայելի դեսպան Էյթան Նայեն հրավիրվել էր Թուրքիայի ԱԳՆ, որտեղ նրան առաջարկվել էր ժամանակավորապես լքել երկիրը: Նրան նաեւ տեղեկացրել էին Գազայի հատվածում տեղի ունեցած իրադարձությունների կապակցությամբ խորհրդակցությունների համար Թուրքիայի դիվանագիտական առաքելության ղեկավարին Թել-Ավիվից հետ կանչելու մասին:
Հիշեցնենք, որ մայիսի 14-ին Իսրայելի՝ Գազայի հետ սահմանին դաժան բախումներ էին սկսվել իսրայելական զինվորականների եւ պաղեստինցի ցուցարարների միջեւ, պատճառ էր հանդիսացել նույն օրը Երուսաղեմում ԱՄՆ դեսպանատան պաշտոնական բացումը: Վերջին տվյալներով՝ բախումների ընթացքում ավելի քան 60 պաղեստինցի է զոհվել, մոտ 2.7 հազար մարդ վիրավորվել է:
