Տեղի է ունենում յուրատեսակ ցույց, ինչում կայանում է գերմանական դիավանգիտությունն ու ԵՄ դիվանագիտությունը. բաց թողնելով դռները բանակցությունների եւ փոխզիջման համար՝ միաժամանակ հստակեցվում է, որ պատժամիջոցների ռեժիմը կարող է խստացվել, եթե Ռուսաստանը հակված չէ ազդել աշխարհազորայինների վրա եւ ճանաչել Ուկրաինայի տարածքային ամբողջականությունը: Այդ մասին NEWS.am-ի թղթակցի հետ զրույցում հայտարարել է Բրիսթոլի եւ Արեւմտյան Անգլիայի համալսարանի ավագ պրոֆեսոր Գյունտեր Վալցենբախը:
Անդրադառնալով Ռուսաստանի եւ Գերմանիայի միջեւ հնարավոր գաղտնի համաձայնությանը, ինչի մասին շրջանառվում է ԶԼՄ-ներում, քաղաքագետը վստահություն է հայտնել, որ նման կապեր գոյություն ունեն եւ անց են կացվում կուլիսների հետեւում: «Թեեւ ես վստահ չեմ, արդյոք նման գործարք իրականում դրված է բանակցությունների սեղանին: Սակայն, թվում է, որ Ուկրաինայի արեւելքում քաղաքացիական օդանավի վթարը փոխել է հանգամանքները: Գերմանիայի կանցլեր Անգելա Մերկելը, ով կողմ էր Ռուսաստանի հետ գործարքին, շատ արագ պաշտպանեց ԵՄ նոր պատժամիջոցները, որոնք համապատասխանում էին ԱՄՆ-ի կիրառած պատժամիջոցներին: Իր հերթին Ռուսաստանը նույնպես արձագանքեց. Բարձր գներ էներգիայի դիմաց, Լեհաստանի պարենամթերքի ներկրման դադարեցում, Ուկրաինայի արեւելքում աշխարհազորայինների պաշտպանություն Չեչնիայի առաջնորդ Ռամզան Կադիրովի կողմից»,- նշել է Գյունտեր Վալցենբախը:
ՆԱՏՕ-ն, նրա խոսքով, իրականում նշում է, թե Դաշինքը բավական չափով չի ֆինանսավորվում Բալթյան հանրապետությունների պաշտպանության համար, եւ որ անելու շատ բան կա: Սակայն ՆԱՏՕ-ի անդամ երկրները ծրագրում են ընդլայնել 5-րդ հոդվածը եւ ներառել նաեւ օգնություն կիբերհարձակումների դեպքում:
«Արեւմուտքի առաջարկությունները ռուսական կողմին կարող են ներառել Ուկրաինայի տարածքային ամբողջականության պաշտպանության եւ ՆԱՏՕ-ի ոչ ընդլայնում, ԵՄ հետ Ուկրաինայի առեւտրական եւ ասոցատիվ համաձայնությունների ճանաչում Ռուսաստանի կողմից Ղրիմի հետագա վերահոսկողության դիմաց: Սակայն, վերջինը կարող է դժվարին հանգամանքի լինել շատերի համար, ընդ որում նաեւ հենց ուկրաինացիների համար: Ուստի գազի շուրջ գործարքի տեսքով «քաղցրացուցիչի» կարիք կզգացվի, որը նախորդների համեմատ ավելի երկար կտեւի»,- ընդգծել է Գյունտեր Վալցենբախը:
Քաղաքագետը կարծիք է հայտնել, թե արդյոք վերոհիշյալ գործարքը կարժանանա ԵՄ աջակցությանը: «Քանի որ, ինչպես երեւում է, այս առնչությամբ ոչինչ վերջնական փուլի չի հասել, մենք դեռ ԵՄ կողմից խիստ պատժամիջոցների ականատես ենք դառնում»,- եզրափակել է Վալցենբախը:
Հիշեցնենք, որ «Independent» թերթը հրապարակել էր հոդված այն մասին, որ Գերմանիան ու Ռուսաստանն աշխատում են խաղաղ կարգավորման գաղտնի ծրագրի շուրջ: Պարբերականի տվյալներով՝ բանակցությունների հիմնական նպատակն է Ուկրաինայի սահմանների կայունացումը, նրա տնտեսության ամրապնդումը: «Միեւնույն ժամանակ կան «առավել վիճելի կողմեր». որպեսզի ռուսական կողմը Մերկելի ծրագրին ընդունելի համարի, միջազգային հասարակությունը պետք է ընդուներ Ղրիմի անկախությունն ու Ռուսաստանի կողմից նրա անեքսիան»,- նշվում է հոդվածում: