Հայաստանում արդեն 300-ից ավելի հյուրանոցային տնտեսություն կա, օգոստոսի 13-ի մամուլի ասուլիսում հայտարարել է ՀՀ էկոնոմիկայի նախարարության զբոսաշրջության եւ տնտեսական զարգացման վարչության պետ Մեխակ Ապրեսյանը: Ըստ նրա՝ այդ թվում ներառված են հյուրանոցները, առողջարաններն ու հանգստյան տները, մոթելներն ու հոսթելները:
«Ինչպես տեսնում եք, բավական շատ են: Չհաշված իջեւանատները, որոնց թիվը շուրջ 200 է: Ընդ որում, ցանկանում եմ ձեր ուշադրությունը հրավիրել այն բանին, որ զբոսաշրջային ենթակառույցի օբյեկտների 60%-ից ավելին Երեւանի սահմաններից դուրս է՝ մարզերում», - նշել է Ապրեսյանը: Նա հավելել է, որ իջեւանատները, հատկապես գյուղերում, շատ տարածված են արեւմտյան զբոսաշրջիկների մոտ: «Նրանցից շատերը գալիս են ոչ թե շքեղ հյուրանոց, դրանով նրանց չես զարմացնի, այլ տեղական կոլորիտի համար», - նշել է պաշտոնյան:
