Հռոմի Ֆրանցիսկոս Պապի երեք հարազատները՝ նրա զարմիկի կինն ու երկու երեխաները, Արգենտինայում ավտովթարի զոհ են դարձել։
Պապի զարմիկը՝ Էմանուել Բերգոլիոն, լուրջ վնասվածք է ստացել, սակայն ողջ է։ Միջադեպը տեղի է ունեցել երեքշաբթի վաղ առավոտյան, կենտրոնական Կորդովա նահանգում, Բուենոս Այրեսից դեպի հյուսիս՝ Ջեյմս Կրեյկ քաղաքից 550 կմ հեռավորությամբ։
Թեթեւ մարդատար ավտոմեքենան, որում գտնվել են Հռոմի Պապի հարազատները, մխրճվել է բեռնատարի մեջ։ Վթարի հետեւանքով զոհված երեխաները 8 ամսական եւ 2 տարեկան են եղել։ Ընտանիքի հայրը ծանր վիճակում հոսպիտալացվել է։
Ֆրանցիսկոս Պապի ներկայացուցիչը՝ Սուրբ Աթոռի մամուլի ծառայության ղեկավար Ֆրանչեսկո Լոմբարդին հաղորդել է, որ Պապը խորապես ցնցված է տեղի ունեցածի առիթով։
«Պապը բոլորին, ովքեր մասնակից են զգում իր ցավին, խնդրում է միանալ իր աղոթքին»,- տեղեկացրել է Լոմբարդին։
