Կարեն Դեմիրճյանի անվան Մետրոպոլիտենի «Բարեկամություն» կայարանում այսօր՝ օգոստոսի 19-ին, ժամը 18:00-ի սահմաններում շարժասանդուղքի տակ ընկած 2 տարեկան աղջնակի հետ կատարվածի համար հարազատները ոչ մեկին չեն մեղադրում, բայց չեն էլ հասկանում, թե ինչպես փոքրիկի ոտքը մնաց շարժասանդուղքի տակ:
«Մայրը երկու երեխաների հետ է եղել, ձեռքերը բռնած՝ հանգիստ իջնում էինք, ոչ շարժվել ենք, ոչ մի բան: Հանկարծ երեխան գոռաց, կարծեցինք՝ պարզապես գոռում է, մեկ էլ տեսանք՝ ոտքը մնացել է աստիճանի տակ: Աննկարագրելի եւ անբացատրելի էր, չենք հասկանում, թե ոնց եղավ, երեւի երեխան պահի տակ ոտքն է շարժել»,- թիվ 3 մանկական հիվանդանոցում NEWS.am-ի թղթակցի հետ զրույցում պատմեց երեխայի բարեկամուհին, ով դեպքի ժամանակ նրանց հետ է եղել:
Բարեկամուհու խոսքով՝ երեխային վիրահատում են։ Բժիշկներն ասել են, որ եթե հյուսվածքները վնասված չլինեն, ապա հետեւանքները ծանր չեն լինի:
Նշենք, որ ավելի վաղ Մետրոպոլիտենի մամուլի ծառայությունից NEWS.am-ին հայտնել էին, որ կատարվածի մեղավորը երեխայի մայրն է եղել: