Թուրքիայի քրդաբնակ Լիջեյի շրջանում PKK-ի առաջին հրամանատարի հուշարձանը հանելու ժամանակ ոստիկանության եւ ցուցարարների միջեւ բախումների ժամանակ քուրդ երիտասարդի սպանության դեմ բողոքի դուրս եկած քուրդ երիտասարները այրել եւ պղծել են Թուրքիայի հանրապետության հիմնադիր Մուսթաֆա Քեմալ Աթաթուրքի կիսանդրին։
Թուրքական Mynet կայքի փոխանցմամբ՝ օգոստոսի 19-ի երեկոյան Հաքքարի շրջանում քուրդ երիտասարդները Լիջեյում PKK-ի հրամանատարի հուշարձանը հանելու եւ քուրդ ցուցարարներից մեկին սպանելու դեմ բողոքի ակցիա են իրականացրել։
Դեմքերը փակած եւ PKK-ի դրոշներով երիտասարդները սկզբում փողոց են փակել եւ անցնող մեքենաները խուզարկել, որից հետո հրդեհել են Աթաթուրքի կիսանդրին, տեղից պոկել եւ գետնի վրա գլորել։
Նշենք, որ թուրքական ժանդարմերիան օգոստոսի 19-ի առավոտյան ապամոտնաժել էր PKK-ի առաջին հրամանատար, 1986 թվականին թուրքական զորքերի հետ բախման ժամանակ սպանված Մահսում Քորքմազի կիսանդրին։ Այդ ժամանակ արձանի ապամոնտաժման դեմ դուրս եկած ցուցարարների եւ զինվորականների միջեւ բախումներ է տեղի ունեցել, որի ժամանակ սպանվել էր 24-ամյա մի ցուցարար։