Էլեկտրոնային սարքավորումներով գիրք ընթերցելը կարող է բարդացնել սյուժեի ընկալումը: Նման եզրահանգնման են եկել նորվեգացի գիտնականները վերջերս կատարած հետազոտության արդյունքում:
Նրանց խոսքով՝ թերթելով էջը եւ զգալով, որ գրքի մեծ մասը դեռ առջեւում է, ընթերցողը ձգտում է ավելի շատ տեղեկություն կլանել: Ըստ «Mail Online»-ի, ուսումնասիրությունը ցույց է տվել, որ հերոսի հետ ապրումները, պատմության մեջ խորասուզվելն ու այն հասկանալը շատ չեն տարբերվում նրանց մոտ, ովքեր կարդում են էլեկտրոնային սարքավորումներով, եւ նրանք, ովքեր նախընտրում են գրքերը: Սակայն, երբ կարդացողներին խնդրել են իրադարձությունները ժամանակագրական կարգով դասավորել, էլեկտրոնային գրքերից օգտվողները շատ ավելի վատ են հաղթահարել առաջադրանքը:
«Երբ սովորական գիրք եք կարդում, կարող եք մատներով զգալ, որ ձախ կողմում էջերի թիվն ավելանում է, աջ կողմում՝ պակասում»,- նշել է ուսումնասիրության առաջատար հետազոոտող Էն Մանգենը՝ Սթավանգերի նորվեգական համալսարանից:
Ավելի վաղ Մանգենի խումբը տասներորդ դասարանցիների շրջանում հետազոտություն էր անցկացրել ու պարզել, որ տեքստը տպագիր կարդալն ավելի արդյունավետ է, քան էկրաններից կարդալը: Փորձի ընթացքում 72 դեռահասների բաժանել են 2 խմբի, հետո նրանց միեւնույն տեքստն են տվել: Առաջին խմբին խնդրել են սովորական համակարգչի էկրանից կարդալ, մյուսին՝ տպագիր տեսքով: