Իրաքի խորհրդարանի խոսնակ Սելիմ ալ Ջուբուրին միացել է իր կուսակիցների բողոքին, որոնք ուրբաթ հրաժարվել էին մասնակցել կառավարության ձեւավորման բանակցություններին: Համապատասխան հայտարարություն է արվել նրա ղեկավարած կուսակցության կողմից` Դիյալա նահանգում մզկիթի վրա կատարված հարձակումից հետո, որի հետեւանքով զոհվել էր գրեթե 70 մարդ, փոխանցում է ԻՏԱՌ-ՏԱՍՍ-ը:
Խորհրդարանի խոսնակին է միացել նաեւ գործող փոխվարչապետ Սալեհ ալ Մութլաքը, որը սուննիական «Ալ Արաբիա» դաշինքի ղեկավարն է:
Երբ օգոստոսի 11-ին Հեյդար ալ Աբադին նշանակվեց կառավարության ղեկավար, Իրաքի խորհրդարանի ներկայացուցիչների խորհրդում բանակցային գործընթաց սկսվեց նախարարների ապագա խորհրդի կազմի վերաբերյալ: Ըստ երկրի Սահմանդրության` վարչապետը նշանակում է կառավարության անդամներին, սակայն բոլոր նշանակումները պետք է հավանություն ստանան խորհրդարանի կողմից: Ըստ օրենսդրության` ալ Աբադին կառավարություն ձեւավորելու համար ունի 30 օր, այնուամենայնիվ, գործընթացը կարող է ավելի երկար ձգվել` թեկնածուների հարցում բազմաթիվ տարաձայնությունների պատճառով: Վառ օրինակ է այն փաստը, որ 2010 թ. ընտրություններից հետո նախարարական պորտֆելների համար պայքարն ընթացել էր ինն ամիս:
