Ուկրաինայի նախագահ Պյոտր Պորոշենկոն համոզված է, որ Ուկրաինան անդառնալիորեն կայացել է՝ որպես եվրոպական ժողովրդավարական երկիր: Այդ մասին նա ասել է Կիեւի Սոֆիայի հրապարակում Ուկրաինայի պետական դրոշի բարձրացման հանդիսավոր արարողության ժամանակ: «Մեր ազգն ամրանում է արդեն ոչ միայն լեզվի կամ էթնոսի, այլ նաեւ Ուկրաինայի բնակչության մեծամասնության ընդհանուր կամքի հիման վրա:Այդ կամքը միասնական, հավաքական, ունիտար ժողովրդավարական եւ եվրոպական պետությունում ապրելու մեջ է: Արդեն անցյալ է դարձել Ուկրաինայի բաժանումը արեւելքի եւ արեւմուտքի, կենտրոնի եւ հյուսիսի միջեւ: Եւ սա նշանակում է, որ մենք վերջնականապես ու անդառնալիերոն կայացել ենք՝ որպես ազգ, որպես ուկրաինացի ժողովուրդ», - ասել է Պորոշենկոն, հաղորդում է UNIAN-ը:
Նախագահի համոզմամբ, այսօր արդեն ակնհայտ է, որ ուրաինացիներին լեզվական հայտանիշով արդեն ոչ ոք եւ երբեւէ չի կարող պառակտել: «Հակաահաբեկչական գոտու ռազմական հոսպիտալում պառկած զինվորների հետ շփվելով՝ ես տեսա եւ լսեցի, որ ռուսերենով Ուկրաինան ոչ պակաս են սիրում, քան ուկրաիներենով: Որքան ընկած մարտիկներ Հայրենիքի կամ մոր, կնոջ կամ սիրելիի մասին իրենց վերջին խոսքերը ասել կամ շշնջացել են ռուսերենով», - ընդգծել է Պորոշենկոն:
Պորոշենկոյի խոսքով, սկզբունքորեն մնալով այն տեսակետին, որ միակ պետական լեզուն պետք է լինի ուկրաիներենը, պետք է պատշաճ կերպով գնահատել նաեւ ռուսախոս քաղաքացիների ավանդը հայրենքի պաշտպանության գործում: Նա ընդգծել է, որ Ուկրաինան այսօր հսկայական տեկտոնական փոփոխությունների շեմին է: «Սիրելի հայրենակիցներ, մեզ մոտ ամեն բան կստացվի: Ամեն ինչ լավ կլինի: Մենք ուժեղ ենք եւ նպատակաուղղված: Եւ ես հպարտ եմ, որ ուկրաինացի եմ: Ուկրաինան մեր հարազատ Հայրենիքն է, սա մեծ երազանքների ու մեծ գործերի վայր է: Մենք՝ որպես ժողովուրդ, ընդունակ ենք մեծ հաղթանակների եւ արտակարգ ջանքերի: Եւ մեզնից յուրաքանչյուրս կարող է եւ պարտավոր է ներգրավվել դրան»: