Ամերիկայի միացյալ նահանգների Նյու Յորք քաղաքում Ռուսաստանի Դաշնության հյուպատոսության մոտ օգոստոսի 22-ին տեղի է ունեցել բողոքի ակցիա՝ ի պաշտպանություն ռուսաստանաբնակ հայ գործարար Լեւոն Հայրապետյանի: Այս մասին NEWS.am-ը տեղեկանում է գործարարի ֆեյսբուքյան էջից:
Մի խումբ քաղաքացիներ ԼՂՀ դրոշով, «Ազատություն Լեւոն Հայրապետյանին» պաստառներով հավաքվել են ՌԴ դեսպանատան մոտ եւ պահանջել ազատ արձակել հայ բարերարին:
Նշենք, որ «Ի պաշտպանություն Լեւոն Հայրապետյանի» առաջին երթը տեղի է ունեցել օգոստոսի 9-ին Երեւանում: Այդ ժամանակ հայտարարվեց, որ նմանատիպ ակցիաներ լինելու են աշխարհի տարբեր երկրներում:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով:
