Առաջիկա շաբաթվա մեջ տեղ կունենա խորհրդարանական քաղաքական ուժերի ոչ իշխանական քառյակի՝ ԲՀԿ-ի, ՀԱԿ-ի, ՀՅԴ-ի, «Ժառանգության» ներկայացուցիչների հանդիպում: Այդ մասին NEWS.am-ի թղթակցի հետ զրույցում հայտնեց «Ժառանգություն» պատգամավորական խմբակցության ղեկավար Ռուբեն Հակոբյանը:
Ինչ վերաբերում է «քառյակի» կողմից առաջ քաշած 12 կետերին, ապա պատգամավորի կարծիքով, իշխանությունը, ըստ էության, ցույց տվեց, որ ժողովրդին ծանրագույն սոցիալ-տնտեսական եւ բարոյահոգեբանական իրավիճակից դուրս բերելու համար ինչ-որ լուրջ քայլեր ձեռնարկելու համար քաղաքական կամք չունի: «Ոչինչ չէր էլ կարող փոխվել եւ ոչ թե նրա համար, որ դա բարդ է, կամ ժամանակը սուղ, այլ պարզապես բացակայում է քաղաքական կամքը: Ես կարծում եմ, որ կան հարցեր, որոնց լուծում կարելի տալ միայն մեկ նիստի ընթացքում. Օրինակ, անցումը 100%-անոց համամասնական ընտրակարգին, ընդդիմությանը որոշակի գործառույթների տրամադրում», - նշեց Ռուբեն Հակոբյանը: Իշխանությունը, բացահայտ կերպով հայտարարում է, որ չի ցանկանում որեւէ բան փոխել պետությունում:
Ոչ իշխանական քառյակի ներկայացուցիչների առաջիկա հանդիպման օրակարգը, Ռուբեն Հակոբյանի խոսքով, դեռ որոշված չէ: «Սակայն ժամանակն ինքը կթելադրի օրակարգը: Առաջին հերթին, սկսում է խորհրդարանի նոր նստաշրջանը, եւ բնականաբար, մենք ունենք ընդհանուր օրինագծերի փաթեթ: Երկրորդը, մոտենում է սեպտեմբերը, անհրաժեշտ է որոշել՝ ինչ պետք է անել մինչեւ սեպտեմբերի 30-ը: Ամեն դեպքում, չեմ կարծում, որ «քառյակից» որեւէ մի ուժ փոխեր իր մոտեցումները, քանի որ իշխանությունը ցույց տվեց, որ բացարձակապես մտադիր չէ իրականացնել ներկայացված 12 կետերից եւ ոչ մեկը», - եզրափակեց «Ժառանգություն» խմբակցության ղեկավարը:
Հիշեցնենք, որ քառյակն իր կետերը հրապարակել է հունիսի 10-ին եւ մինչեւ սեպտեմբերի ավարտը ժամանակ տվել իշխանություններին՝ պահանջները կատարելու համար:
Այդ կետերը վերաբերվում են կուտակային կենսաթոշակային համակարգին, շրջանառության հարկին, կարմիր գծանշումներին, գյուղմթերքի արտադրությանը, «Նաիրիտ» գործարանին, «Որոտան» ՀԷԿ-երի համալիրի գույքի վաճառքին, տրանսպորտի թանկացմանը, 100 տոկոսանոց համամասնական ընտրակարգին:
Նշված ժամանակը լրանալուց հետո նշված ուժերը նախատեսում են համահանրապետական համատեղ ցույց անցկացնել:
