Հունաստանի խորհրդարանում ռասիզմին մասնակցության կամ ռասիզմի հողի վրա բռնության հրահրման համար ֆիզիկական անձանց եւ քաղաքական կուսակցությունների պատժի խստացման մասին օրինագիծը քննարկման կներկայացվի ոչ թե օգոստոսի 26-ին, ինչպես ծրագրվում էր, այլ սեպտեմբերի 1-ին: Այս մասին NEWS.am-ի թղթակցի հետ զրույցում հայտարարեց Հունաստանի հայկական «Ազատ օր» թերթի գլխավոր խմբագիր Հռիփսիմե Հարությունյանը:
Նշենք, որ օրինագիծը քրեական պատասխանատվության մասին կետ է պարունակում «ցեղասպանության, մարդկության դեմ հանցանքների, ռազմական հանցագործությունների, Հոլոքոստի եւ նացիզմի նշանակության» հերքման կամ գովաբանության դեպքում, երբ դա ռասսայական ատելություն կամ բռնություն է հարուցում:
Հռիփսիմե Հարությունյանի խոսքով՝ Հունաստանի հայ համայնքը հետեւում է իրադարձությունների ընթացքին: «Մենք ակնկալում ենք, որ այս օրինագծով Հայոց ցեղասպանության ժխտումը կդիտարկվի որպես քրեական հանցագործություն: Օրինագծի նախնական տարբերակում այս կետը ներառված չէր: Սակայն Սեւծովյան տարածաշրջանում եւ Փոքր Ասիայում պոնտոսցի հույների ցեղասպանության մասին կետի ընդգրկման անհրաժեշտության մասին Հունաստանի խորհրդարանի պատգամավորներին ուղղված մեր խնդրանքների եւ պահանջների հիման վրա հանրային քննարկում սկսվեց: Եվ սեպտեմբերի 1-ին երկու ցեղասպանությունների քննարկումից հետո դրանք պետք է ներառվեն օրինագծում»,- նշեց Հռիփսիմե Հարությունյանը:
Հիշեցնենք, որ օգոստոսի 26-ին խորհրդարանը պետք է քննարկեր մի օրինագիծ, որի դրույթների համաձայն՝ կուսակցությունները կամ միավորումները, որոնք առաջ են քաշում ռասիզմի գաղափարներ, զրկվելու են պետական ցանկացած տեսակի ֆինանսավորումից՝ մեկից վեց ամիս ժամկետով: Ռասիստական գործողություններին մասնակցած անձինք կարող են ազատազրկման ենթարկվել երեք ամսից մինչեւ երեք տարի ժամկետով: Նրանց սպառալու է նաեւ 5-20 հազար եվրոյի չափով տուգանք: Եթե նրանց գործողությունները հանգեցրել են այլ հանցագործության, ապա սպառնում է նվազագույնը 6 ամիս ժամկետով ազատազրկում:
Երեք ամսից մինչեւ երեք տարվա ազատազրկման կդատապարտվեն նաեւ նրանք, ովքեր գովաբանում կամ հերքում են «ցեղասպանության, մարդկության դեմ հանցանքների, ռազմական հանցագործությունների, Հոլոքոստի եւ նացիզմի նշանակությունը»: Եթե օրինախախտը պատգամավոր է կամ պետական պաշտոնյա, ապա ազատազրկումը կկազմի 3-5 տարի:
Նշենք, որ Հունաստանի խորհրդարանը Հայոց ցեղասպանությունը ճանաչել է 1994 թվականին:
