Ուկրաինայի նախագահ Պյոտր Պորոշենկոն եւ Գերմանիայի դաշնային կանցլեր Անգելա Մերկելը հեռախոսազրույցի ընթացքում քննարկել են Մինսկի հանդիպման արդյունքները եւ Դոնեցկում ու Լուգանսկում իրավիճակի կարգավորման բանակցությունները:
«Ուկրաինայի նախագահ Պորոշենկոն շարունակել է հեռախոսային խորհրդակցությունը Գերմանիայի կանցլեր Մերկելի հետ: Քննարկումների ընթացքում Պորոշենկոն Մինսկի բազմակողմանի հանդիպման արդյունքները բնութագրել է որպես դրական ազդանշաններ, որոնք կարող են սկիզբ դնել Դոնբասում իրավիճակի խաղաղ կարգավորմանը: Նրանց շարքում է սահմանին վերահսկողության խնդրի վերաբերյալ ընդհանուր մոտեցումներ գտնելը, որոշակի քայլերը պատանդների ազատագրման հարցում, առեւտրային հարաբերությունների վերաբերյալ երկխոսության կառուցումը», - հայտնում է Ուկրաինայի նախագահի մամուլի ծառայության ղեկավարը: Զրուցակիցները համաձայնել են, որ նախագահ Պորոշենկոյի խաղաղ ծրագրի տրամաբանությունը աջակցություն է գտել Մինսկի հանդիպման մասնակիցների շրջանում: «Պորոշենկոն եւ Մերկելը քննարկել են նաեւ բանակցությունների հետագա միջազգային ձեւաչափը, մասնավորապես, Նորմանդիայի կամ Ժնեւի ձեւաչափում դրանք շարունակելու հնարավորությունը ՝ Մինսկի հանդիպման արդյունքներով խաղաղ կարգավորման ուղղությամբ աշխատելու համար, - նշվում է հաղորդագրության մեջ: