Հայկական «Cigaronne» ընկերությունը ծխախոտի շուկայում նոր արտադրանք է ներկայացրել, որի որակական հատկանիշները եւ արտադրական տեխնոլոգիան հնարավոր է հեղաշրջում կատարի ծխախոտի միջազգային շուկայում: Այս մասին NEWS.am-ի թղթակցի հետ զրույցում ասացին ընկերության մամուլի ծառայությունում, նշելով որ ընկերության կողմից մշակած բազմափուլ տեխնոլոգիաների կիրառմամբ իրականացվել է թութունի վերամշակում եւ մաքրազտում, որի շնորհիվ հնարավոր է դարձել պատրաստի ծխախոտափնջից դուրս մղել ազոտա-ծծմբային-ֆոսֆորային-քլորային պարունակությամբ քաղցկեղածին թունավոր օրգանական նյութերը` պեստիցիդները, էապես նվազեցնելով ծխելու հետեւանքով առաջացող հիվանդությունների հավանականությունը: «Փորձարկումները տեւել են մեկուկես տարի: Թունավոր նյութերի բացակայության մասին կա համապատասխան մարմնի փորձագիտական եզրակացություն: Կիրառվող տեխնոլոգիայի արդյունքում վերանում է նաեւ ծխելու հետեւանքով բերանում առաջացող դառնահամը, դառնահոտը, ծխողներին հատուկ վաղորդյան հազը: Այս մասին վկայում են կատարված դեգուստացիաները»,- նշեց նա:
«Cigaronne»-ը մեկ այլ նորարարություն եւս կատարել է: Ընկերությունը նոր ապրանքատեսականու համար մշակել եւ պատենտավորել է եռաշերտ, կոմբինացված պեռլիտ պարունակող ֆիլտր:
Նշենք, որ պեռլիտը ապահովում է ծխի մեջ առկա խեժի եւ նիկոտինի մինչեւ 90 տոկոս կլանում, լիակատար միկրոֆիլտրացիայի ենթարկում այրման ժամանակ առաջացող բազմաթիվ թունավոր նյութերը՝ նվազեցնելով օնկոլոգիական եւ սիրտ–անոթային հիվանդությունների առաջացման ռիսկը:
Ապացուցված է որ պեռլիտն իր էֆեկտիվությամբ կլանում է ֆենոլային շարքի միացությունները,կասեցնում է հիդրոխինոնը և ռեզերցինոլը,որոնք շատ վնասակար են մարդու և նրա կեցության միջավայրի համար:
