Ռուս գործարար եւ նախկին քաղբանտարկյալ Միխայիլ Խոդորկովսկին կոչ է անում ռուսներին դուրս գալ փողոց եւ բողոքել Ուկրաինայի դեմ Ռուսաստանի կողմից հրահրվող պատերազմի դեմ: Այդ մասին ասվում է գործարարի կայքում տեղադրված հաղորդագրության մեջ:
«Մենք պատերազմում ենք Ուկրաինայի դեմ: Իրապես: Այնտեղ զինվորներ ու տեխնիկա ենք ուղարկում: Ուկրաինացիները լավ են կռվում, սակայն նահանջում են: Ուժերն, իհարկե, անհավասար են: Ընդ որում, մեր իշխանությունն անընդհատ ստում է: Ինչպես ստում էր 80-ականներին Աֆղանստանի հարցով: 90-ականներին՝ Չեչնիայի: Իսկ այսօր ահա՝ Ուկրաինայի: Իսկ մենք թաղում ենք մեր երեկվա ծառայակիցներին, ընկերներին, հարազատներին, որոնք երկու կողմից սպանում են իրար ոչ թե նրա համար, որ ցանկանում են, այլ որ ծերացող իշխանությանը արյուն է պետք: Մենք այդ ամենը գիտենք, ուստի իշխանությունը ստում է», - ասվում է հաղորդագրության մեջ:
Խոդորկովսկին կարծում է, որ ռուսները կարող են կանգնեցնել պատերազմը:
«Բավական է միայն դուրս գալ փողոց, սպառնալ գործադուլով: Իշխանությունը անմիջապես կզիջի, քանի որ վախկոտ է: Բայց ոչ, մենք կձեւացնենք, որ հավատում ենք: Եւ կարտասվենք թաղումների ժամանակ: Ես այլեւս չեմ ցանկանում լռել ու չեմ լռի», - գրել է Խոդորկովսկին:
