Երևանի Սարի թաղի 7-րդ փողոցի թիվ 18 տանը տեղի է ունեցած փլուզման հետեւանքով նախօրեին՝ օգոստոսի 27-ին մահացած 31-ամյա տղամարդը մալական ռուս է եղել, որը շինարարական աշխատանքներ էր կատարում նշված հասցեում: Այս մասին NEWS.am-ի հետ զրույցում պատմեցին հարեւանները:
«Պատշգամբի առաստաղն է փլվել, եւ կապ չի ունեցել ընդհանուր շինության հետ: Հրավիրված աշխատողներ են եղել: Մյուս աշխատողը լուրջ վնասվածքներ չուներ, ուղղակի քերծվածքներ էր ստացել, շտապօգնության մեքենայի միջից դուրս եկավ ու նույնիսկ շարժվում էր։ Մահացողը մալական էր, անցած տարի էլի էին ստեղ գործ անում»,- պատմեց հարեւաններից մեկը:
Հարեւանի խոսքով՝ այնտեղ, որտեղ փլուզում է եղել ապրում է նկարիչ Մայիս Մխիթարյանը. «Էդ շենքի մեջ հենց իր արվեստանոցն է:Մարդ ու կին երեկ լացում էին ձայնով, իրանց երեխան չի եղել, Աստված հեռու տանի, բայց իրանց օջախում է եղել, իրանք ողբում էին երեկ»:
Հարեւաններից մեկը, որը շինարար է, ասաց, որ իր կարծիքով, փլուզման համար մեղավոր են եղել շինարարները. «Բետոնի տակ նստած են եղել, ու ընկել է նրանց վրա: Պետք է ուշադիր լինեին իրենց գործի մեջ, առաջնահերթ պետք է անվտանգության տեխնիկան պահպանեն: Եթե տեսել են, որ ճաքեր կան, պետք է տակը փայտերը դնեն, որ չփլվի»:
Տան բնակիչները չցանկացան խոսել, նկարչի որդին միայն ասաց, որ «ի վիճակի չեն խոսել, դժբախտ պատահար է եղել»:
