Հայոց Ցեղասպանության 100-րդ տարելիցը սգո արարողություն է, որին չեն հրավիրում: Այսօր՝ օգոստոսի 29-ին, Սերժ Սարգսյանի՝ Էրդողանին ուղարկված հրավերին լրագրողների հետ զրույցում այսպես արձագանքեց տարածաշրջանային փորձագետ, հրապարակախոս-վերլուծաբան Սարգիս Հացպանյանն:
Նրա պնդմամբ՝ միայն նամակի համար սխալ էր ԱԳ նախարար Էդվարդ Նալբանդյանին Թուրքիա ուղարկելը, առավել եւս որ երկու պետությունները դիվանագիտական հարաբերություններ չունեն. «Նախ սա սխալ էր դիվանագիտական առումով՝ մարդը ցույց է տալիս, որ ինքն իր տեղում չէ: Սա երեւի բնության մեջ չեղած բան է, երբ երկու երկրների միջեւ չկան դիվանագիտական հարաբերություններ, սակայն մեր երկրի դիվանագետը ներկա է գտնվում մի մարդու երդման արարողությանը, որը երբեւէ մարդավայել, քաղաքակիրթ, պետական գործչին հարիր արտահայտություն չի արել հայի, հայության, Հայաստանի հանդեպ: Եթե նամակ պետք է փոխանցվի, նախօրոք հայտարարում են, ասում են, թե ինչ նպատակով է մեկնում, ոչ թե ընդունեց՝ նամակը կտաս, չընդունեց՝ ի՞նչ պիտի անես»:
Փորձագետը կարծում է, որ հայկական կողմը դեռ չի կողմնորոշվել, թե ինչ պիտի պահանջի Թուրքիայից, հետեւաբար, 2015թ. ապրիլի 24-ին էլ չի կարող ասել՝ ճանաչիր Ցեղասպանությունը:
Նշենք, որ Օգոստոսի 28-ին արտգործնախարար Էդվարդ Նալբանդյանը Անկարայում ներկա է գտնվել Թուրքայի նորընտիր Նախագահ Ռեջեփ Թայիփ Էրդողանի պաշտոնի ստանձնման արարողությանը։ Այնուհետեւ պատվիրակությունների ղեկավարների պատվին տրված ընդունելությանը նախարար Նալբանդյանը կարճատեւ զրույց է ունեցել նախագահ Էրդողանի հետ, որին հանձնել է ՀՀ նախագահ Սերժ Սարգսյանի պաշտոնական հրավերը՝ 2015թ. ապրիլի 24-ին ներկա գտնվելու Երեւանում կայանալիք Հայոց ցեղասպանության զոհերի հիշատակի ոգեկոչման արարողությանը։
