Մոսկվայում կալանավորված ռուսաստանաբնակ հայ գործարար Լեւոն Հայրապետյանին հնարավոր է առաջիկա 2 օրերի ընթացքում ազատ արձակեն: Այս մասին NEWS.am-ին ասաց գործարարի մտերիմ ընկեր Մացակ Փոլադյանը:
«Լեւոն Հայրապետյանի առողջական վիճակը շատ վատ է, հոգեպես էլ է արդեն վատ: Եթե տասը օր առաջ ուրիշ հոգեվիճակում էր, ապա այսօր ավելի վատ վիճակում է, ճնշումն է տատանվում անընդհատ, հիշողությունն է վատթարացել: Նախ, ոչ բոլոր դեղերն է ստանում, հետո էլ անհրաժեշտ սարքավորումները չկան կալանավայրում: Մենք բազմակողմանի աշխատանքներ ենք տարել եւ հույս ունենք, որ առաջիկա օրերին դրական լուր կստանանք: Սպասողական վիճակ է, շատ հնարավոր է՝ վաղը կամ մյուս օրն արդեն ազատ արձակվի»,- ասաց նա:
Նրա խոսքով՝ Լեւոն Հայրապետյանին ազատ արձակելու համար դիմել են տարբեր քայլերի, սակայն այդ մասին դեռ խոսել չեն կարող: Հարցին՝ արդյոք Հայաստանի իշխանություններն օգնել են հայ գործարարին, Փոլադյանը բացասական պատասխան տվեց՝ ընդգծելով, որ անձամբ Լեւոն Հայրապետյանն էլ մեր իշխանությունների օգնությունը չի զգում:
Նշենք, որ ՌԴ ՔԿ-ն հուլիսի 24-ին մեղադրանք էր ներկայացրել Լեւոն Հայրապետյանին՝ ՌԴ ՔՕ 160 (յուրացում կամ վատնում) եւ 174 (ապօրինի եղանակով ձեռք բերված միջոցների լվացում) հոդվածներով: