Եվրոպական երկրների քաղաքականությունը վերջիվերջո կհանգեցնի նրան, որ եվրոն ու դոլարը մոտ ապագայում կախված կլինեն յուանից եւ ռուբլուց, հայտարարել է կուբայական հեղափոխության առաջնորդ Ֆիդել Կաստրոն:
«Եվրոպական տնտեսական համայնքը՝ ԱՄՆ-ի անդրդվելի եւ անվերապահ ղեկավարությամբ, հաշվարկել է, որ եկել է երկու մեծագույն ազգերի հետ հաշիվները մաքրելու ժամանակը, ազգերի, որոնք, ոգեշնչված Մարքսի գաղափարներով, խիզախել են եւ վերջ դրել Եվրոպայի եւ ՄԱՆ-ի կողմից աշխարհի վզին փաթաթված գաղութատիրությանն եւ կայսերական աշխարհակարգին», - գրել է Ֆիդել Կաստրոն Cubadebate կայքում հրապարակված «Կհաղթի արդարությունը կամ աղետը» վերնագրով իր հոդվածում:
Կաստրոն հավաստիացնում է, որ մոտ ապագայում եվրոն ու դոլարը կդառնան «անօգուտ թուղթ»: Նրա խոսքով՝ Չինաստանի տնտեսության աճը, որը զարգանում է հսկայական տնտեսական ու տեխնիկական ներուժ ունեցող Ռուսաստանի տնտեսության հետ փոխգործակցության պայմաններում, կհանգեցնի նրան, որ եւ եվրոպական, եւ ամերիկյան արժույթները «կախված կլինեն յուանից եւ ռուբլուց»:
Նշենք, որ այդ հոդվածում Կաստրոն քննադատության է ենթարկել ՆԱՏՕ-ի անդամ-երկրներին:
«Ոչ ոք իրավունք չունի ավերակների վերածել քաղաքներ, սպանել երեխաներին, ոչնչացնել տներ՝ ամենուր վախ, սով եւ մահ սերմանելով», - ասվում է հոդվածում:
Կուբայական հեղափոխության առաջնորդի խոսքով՝ Երկրորդ աշխարհամարտից հետո ՄԱԿ-ի ստեղծումը բազմաթիվ պատրանքներ է ծնել, սակայն այժմ դրանք վերածվել են «վիթխարի խաբեության», իսկ ՆԱՏՕ-ի ագրեսիվ բուրժուական կառավարությունները «դարձել են Եվրոպայի եւ ամբողջ աշխարհի ծաղրի առարկան», հաղորդում է «Ռոսբալտը»:
