Բելառուսի նախագահ Ալեքսանդր Լուկաշենկոն Ուկրաինայի հետ սահմանի նշագծման աշխատանքներն արագացնելու մասին հրամանագիր է ստորագրել: Ըստ փորձագետների՝ դա կապված է Ուկրաինայում ծավալվող վերջին դեպքերի հետ:
Ուկրաինայի հետ սահմանի նշագծման աշխատանքները կիրականացնի Բելառուսի պետական սահմանապահ կոմիտեն, թեեւ ավելի վաղ Մինսկն ու Կիեւը ԵՄ-ի օգնությունն էին ակնկալում ընթացակարգն իրականացնելիս, հայտնում է BBC-ի ռուսական ծառայությունը:
Բելառուսա-ուկրաինական սահմանի երկարությունը 1084,2 կմ է: ԽՍՀՄ նախկին պետությունների միջեւ ներկայիս սահմանը հաստատվել էր 1939թ.՝ Արեւմտյան Բելառուսի եւ Արեւմտյան Ուկրաինայի ԽՍՀՄ-ին միանալու պահից՝ Մոլոտով-Ռիբենտրոպի պակտի արդյունքում: Խորհրդային պետությունների միջեւ սահմանն առաջին անգամ ճանաչվել էր Բելառուսի եւ Ուկրաինայի ԽՍՀ-ների կողմից՝ 1990թ. դեկտեմբերի 12-ին:
Նախորդ տարվա նոյեմբերին Ուկրաինայի, Բելառուսի եւ Ռուսաստանի սահմանների հատման վայրում հանդիսավորությամբ բացվել էր սահմանային առաջին նշանը, կողմերը հայտարարել էին սահմանների նշագծման գործընթացի մեկնարկի մասին՝ նշելով, որ աշխատանքները մինչեւ 10 տարի կտեւեն:
