Էրդողանի թշնամիները քրդերը, հայերը, հույները կամ կիպրացիները չեն: Թուրքական կառավարության թշնամին Թուրքիայի ներսում է, նրա սեփական հասարակության մեջ: Այս մասին սեպտեմբերի 9-ին կայացած «Թուրքիայի նոր կառավարության քաղաքականությունը. ազդեցությունը Հայաստանի եւ Հարավային Կովկասի վրա» թեմայով քննարկման ժամանակ հայտարարել է Տարածաշրջանային հետազոտությունների կենտրոնի ղեկավար, վերլուծաբան Ռիչարդ Կիրակոսյանը:
Նրա կարծիքով՝ թուրք հասարակության ներսում բեւեռացումը եւ հակամարտությունը միայն կավելանան եւ կխորանան: «Հայաստանի համար կարեւոր է, թե ինչ հարեւան կունենա, եւ շատ կարեւոր է ավելի ուշադիր հետեւել Թուրքիայի ներսում տեղի ունեցող գործընթացներին: Թուրքիայի ապագան վտանգված է. սա թուրք հասարակության ուշադրությունը գրավելու հնարավորություն է Հայոց ցեղասպանության ճանաչման մասին տեղեկացվածության տեսակետից»,- նշել է Կիրակոսյանը:
Միաժամանակ, նա հավելել է, որ դա հնարավորություն է Հայաստանի համար՝ ավելի մեծ աշխարհաքաղաքական համատեքստում խորացնել համագործակցությունը Վրաստանի հետ՝ ուկրաինական իրադարձություններից հետո ստեղծված իրավիճակը փոխելու համար:
