Մոսկվայի քաղաքային դատարանը քիչ առաջ նոր մեղադրանք առաջադրեց ռուսաստանաբնակ հայ գործարար Լեւոն Հայրապետյանին:
NEWS.am-ը Ռուսաստանի Հայերի միության մամուլի ծառայությունից տեղեկացավ, որ գործով քննիչ Վեսելյեւը նոր մեղադրանք առաջադրեց մեքենայության հոդվածով: Մինչդեռ հայ գործարարը կտրականապես հերքում է մեղադրանքը:
«Հորինված գործ է, քննիչն էլ ստախոս է»,- ասաց նա:
Նշենք, որ այսօրվա նիստին քննարկվում է Լեւոն Հայրապետյանի կալանքը երկարաձգելու հարցը:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով:
