Ազգային ժողովի ոչ իշխանական չորս ուժերը շարունակում են համագործակցությունը «Դեմ եմ» շարժման հետ՝ Կուտակային կենսաթոշակների մասին օրենքի հետ կապված եւ ամենայն հավանակությամբ նրանք միասին կդիմեն Սահմանադրական դատարան: Այս մասին NEWS.am-ին ասաց ԱԺ ԲՀԿ խմբակցության քարտուղար Նաիրա Զոհրաբյանը:
«Մենք համագործակցել ենք «Դեմ եմ» շարժման հետ եւ շարունակելու ենք համագործակցել: Մինչեւ Սահմանադրական դատարան դիմելը՝ իրենց հետ կքննարկենք օրենքի բացթողումները, կլսենք իրենց դիտարկումները, կարծիքները, որից հետո միասին նախորդ հայցի նման կդիմենք դատարան, եթե իհարկե, «Դեմ եմ»-ը ցանկանա: Մենք մշտապես տեսակետների փոխանակման մեջ ենք»,- ասաց նա:
Հարցին, թե հնարավոր է քառյակի նախաձեռնած հանրահավաքին մասնակցի «Դեմ եմ»-ը, Նաիրա Զոհրաբյանը պատասխանեց. «Ոչ, չեն մասնակցելու, քանի որ մեր հանրահավաքն ուղղված է կառավարությանը ներկայացրած մեր 12 պահանջների կատարմանը»:
Նշենք, որ Սահմանադրական դատարան դիմելու մասին քառյակը հայտարարել է սեպտեմբերի 9-ին: Լրագրողների հետ զրույցում ՀՅԴ խմբակցության ղեկավար Արմեն Ռուստամյանը հայտնել էր, որ չնայած ՀԱԿ-ն ու «Ժառանգությունը» աննպատակահարմար են համարում ՍԴ դիմելը, այնուամենայնիվ նրանք պատրաստ են միանալ նախաձեռնությանը: