Սահմանադրական բարեփոխումներ իրականացնելու միակ նպատակը ներկայիս վարչախմբին՝ իշխանությունը վերարտադրելու հնարավորություն տալն է, սակայն Սերժ Սարգսյանի այս ծրագիրը տապալվելու է։ Այսօր՝ սեպտեմբերի 16-ին, լրագրողների հետ զրույցում այսպիսի կարծիք հայտնեց ՀԱԿ մամուլի խոսնակ Արման Մուսինյանը։
«Այս ծրագրի հիմնական նպատակը Սերժ Սարգսյանի վերարտադրության խնդիրը լուծելն է, քանի որ Սահմանադրությունն արգելում է երրորդ անգամ հայտնվել նախագահի աթոռին։ Երկրորդ՝ եթե ինձ կասեք մի դեպք, երբ վարչախմբի ղեկավարը դեմ է մի բանի, իսկ անդամները հակառակն են ասում։ Սահմանադրական բարեփոխումների դեպքում Սարգսյանն ասում է, թե դեմ է բարեփոխումներին, մինչդեռ իր թիմի անդամները թեւերը քշտած հակառակն են պնդում։ Ես համոզված եմ, որ Սերժ Սարգսյանը տապալելու է այս բարեփոխումները։ Նա իր իշխանությունը չի վերարտադրի. Նորից եմ ասում՝ Սերժ Սարգսյանը հենց այս պատճառով էլ առաջ է քաշել չարաբաստիկ սահմանադրական բարեփոխումները»,- ասաց նա։
Արման Մուսինյանի խոսքով՝ եթե հանկարծ այս բարեփոխումները լինեն, ապա դա կլինի Հայաստանի վերջը։
Նշենք, որ Սահմանադրական բարեփոխումների հայեցակարգը հասարակությանն ու նախագահին կհանձնեն մինչեւ հոկտեմբերի 10-ը։