Հայաստանի անկախության անցած 23 տարիները հաստատեցին կիսանախագահական համակարգի չկայացվածությունը, երկրում իշխանության բացարձակ կենտրոնացում է գործում: Այդ մասին այսօր՝ սեպտեմբերի 16-ին, սահմանադրական բարեփոխումների քննարկման ժամանակ հայտարարեց ՀՅԴ պատգամավորական խմբակցության անդամ Արծվիկ Մինասյանը:
Նրա խոսքով՝ իշխանության բացարձակ կենտրոնացման հետեւանքը եղան այնպիսի բաղասական երեւույթներ, ինչպիք են կոռուպցին, արտագաղթը եւ այլն: Պատգամավորը նշեց, որ այսօր քննարկումների ժամանակ ՀԱԿ խմբակցության ղեկավար Լեւոն Զուրաբյանը հիշեցրեց կառավարաման խորհրդարանական համակարգի բացասական հետեւանքների շուրջ առաջին նախագահ Լեւոն Տեր-Պետրոսյանի ելույթի մասին: Արծվիկ Մինասյանը Զուրաբյանին խորհուրդ տվեց կրկին ծանոթանալ առաջին նախագահի փաստարկների հետ եւ նշեց, որ Տեր-Պետրոսյանի կողմից թվարկված շատ գործոններ առկա են եւ այսօր՝ կառավարման կիսանախագահական համակարգի դեպքում:
«Ստեղծված պայմաններում, եթե նախագահը եւ խորհրդարանական մեծամասնությունը տարբեր ուժեր ներկայացնեն, դա կհանգեցնի քաղաքական ճգնաժամին քանի որ մեկ ուժը խոչընդոտելու է մյուսի ծրագրի իրացմանը», - ընդգծեց Մինասյանը: Բացի դրանից, Մինասյանի խոսքով՝ գործող Սահմանադրությունը թեեւ հաստատում է իշխանության տարբեր ճյուղերի, քաղաքացիների իրավունքների եւ ազատությունների տարանջատումը, սակայն դա միայն դեկլարատիվ բնույթ է կրում, դրանց իրացման իրական մեխանիզմներ չկան: «Այսօր քաղաքացիական շարժումները զրկված են իրավիճակի վրա ազդելու լծակներից: Այն ալիքի դեպքում, որ բարձրացավ կուտակային բարեփոխումների շուրջ, հարցը պետք է հանրաքվեի դրվեր», - կարծում է պատգամավորը:
Մինասյանը համոզված է, որ ոչ իշխանական խորհրդարանական ուժերը պետք է մշակեն փոփոխութւյունների իրենց վարկածը եւ պարտավորեցնեն իրենց պահանջների կատարումը՝ նախքան սահմանադրական բարեփոխումների ընդունումը:
