ՆԱՏՕ-ի գագաթաժողովի հռչակագիրը հիմնված է ՄԱԿ-ի կանոնադրության եւ Հելսինկյան եզրափակիչ ակտի վրա՝ որպես ղարաբաղյան հակամարտության կարգավորման ելման կետեր: NEWS.am-ի թղթակցի՝ Ուելսում ընդունված հռչակագիրը մեկնաբանելու խնդրանքին այսպես է պատասխանել ԵԱՀԿ ՄԽ ամերիկացի համանախագահ Ջեյմս Ուորլիքը:
ՆԱՏՕ-ի գագաթաժողովին ընդունված հռչակագիրը կարծես թե առաջնայնություն է տալիս տարածքային ամբողջականությանը՝ որպես հակամարտությունների կարգավորման հիմք: Ինչպե՞ս սա կմեկնաբանեք:
Որպես ազատ եւ խաղաղ ընդհանուր Եվրոպային նվիրված Դաշինք՝ ՆԱՏՕ-ն հետաքրքրված է ձգձգված հակամարտությունների կարգավորմամբ, այդ թվում՝ Լեռնային Ղարաբաղի: Կարեւոր է ընդգծել, որ ՆԱՏՕ-ի գագաթաժողովի հռչակագիրը կոչ էր անում կողմերին աշխատել կարգավորման ուղղությամբ՝ հաստատված բանակցային ձեւաչափի շրջանակներում: Լեռնային Ղարաբաղի դեպքում ձեւաչափը, որին հավանություն են տվել եւ ամբողջովին սատարում են կողմերը՝ ԵԱՀԿ Մինսկի խումբն է: ՆԱՏՕ-ի հռչակագիրը նաեւ վկայակոչում է ՄԱԿ կանոնադրությունը եւ Հելսինկյան Եզրափակիչ ակտը՝ որպես հակամարտության կարգավորման ուղենիշային սկզբունքներ: Այդ սկզբունքները ներառում են ուժի կամ ուժի սպառնալիքի չկիրառումը, տարածքային ամբողջականությունը եւ ժողովուրդների իրավահավասարության եւ ինքնորոշման իրավունքը: Կարգավորումը պետք է հիմնված լինի բոլոր այս սկզբունքների վրա: Համանախագահ երկրները կշարունակեն աշխատել կողմերի հետ՝ հասնելու տեւական կարգավորման:
Ի՞նչ եք մտածում Եվրոպայի խորհրդի խորհրդարանական վեհաժողովում Արցախի վերաբերյալ բանաձեւեր եւ այնուհետեւ զեկույց ընդունելու նախաձեռնությունների մասին:
ԵԱՀԿ Մինսկի խմբի համանախագահները տեղյակ են ղարաբաղյան հակամարտության առնչությամբ ԵԽԽՎ-ի կողմից ձեռնարկած քայլերի մասին։ Մենք ցանկանում ենք շեշտել, որ Մինսկի խմբի գործընթացը՝ ԵԱՀԿ միջոցով, կողմերի եւ միջազգային հանրության կողմից ճանաչված բանակցային ձեւաչափ է: Հուսով ենք, որ բոլոր կողմերը կառուցողական կաշխատեն մեզ հետ՝ հասնելու տեւական կարգավորման:
