Ազգային ժողովի ՀՀԿ խմբակցությունն առաջին քառօրյայի բոլոր քվեարկություններին ակտիվ մասնակցել է, իսկ քննարկումների ժամանակ նիստերի դահլիճում ներկա լինելը ոչ միայն պարտադիր չէ, այլեւ նույնիսկ սխալ: Այս մասին NEWS.am-ին ասաց ՀՀԿ-ական պատգամավոր Սուքիաս Ավետիսյանը՝ մեկնաբանելով սեպտեմբերի 6-ին ՀՀ նախագահ Սերժ Սարգսյանի հանձնարարությունը կատարելը:
«Մենք կատարել ենք Սերժ Սարգսյանի հանձնարարությունը, որովհետեւ խմբակցության բոլոր անդամները՝ 72 պատգամավոր, ներկա է եղել քվեարկություններին: Ուղղակի մեր հասարակության մեջ թյուր կարծիք կա Ազգային ժողովի նիստերի դահլիճում գտնվելու մասին: Բոլորին թվում է, որ բոլոր հարցերի քննարկումների ժամանակ բոլոր պատգամավորները պետք է ներկա լինեն, իսկ ես դեմ եմ նման բանի, որովհետեւ այդ քննարկումների ժամանակ հենց այդ պատգամավորները նույնիսկ այդ հարցի շուրջ խնդիր ունեն՝ դուրս գալու եւ այլ կառույցների դիրքորոշումները ճշտելու: Հետեւաբար, սխալ է նման կերպ մեկնաբանելը»,- ասաց նա:
ՀՀԿ-ական պատգամավորը խորհուրդ է տալիս լրագրողներին դատարկ դահլիճը նկարահանելու փոխարեն ուսումնասիրել այլ երկրների խորհրդարանները եւ կհասկանան, որ նորմալ է նման պատկերը. «Կա Ազգային ժողով, երբ 200-300 պատգամավորներից ներկա է ընդամենը 5 պատգամավոր: Ես ներկա եմ եղել նման պատկերի եւ երբ հարցրել եմ, ասել են, որ քննարկմանը ներկա են այն պատգամավորները, ում հարցը հետաքրքրում է»:
Հիշեցնենք, որ ՀՀԿ վերջին խորհրդի նիստի ժամանակ Սերժ Սարգսյանը իր ելույթում, դիմելով ՀՀԿ-ական պատգամավորներին, ասել է՝ բոլոր գործերը դնել մի կողմ եւ զբաղվել օրենսդրական գործունեությամբ: Նա ԱԺ աշխատանքներից բացակայելը դասալքություն է համարել: