Լիտվայում առաջիկայում Հյուսիսատլանտյան դաշինքի արագ արձագանքման ուժերի հրամանատարական կետ կտեղակայվի, հայտնել է լիտվական բանակի հրամանատար, գեներալ Յոնաս Ժուկասը:
«Սկզբունքային որոշում է կայացվել: Մանրամասն կառուցվածքը կպարզվի Եվրոպայում ՆԱՏՕ-ի միավորված ուժերի գլխավոր հրամանատար, ամերիկացի գեներալ Ֆիլիպ Բրիդլավի եւ Բալթիկայի ու Լեհաստանի զինված ուժերի հրամանատարների հետ հարցի քննարկման ժամանակ», - նշել է նա, փոխանցում է ԻՏԱՌ-ՏԱՍՍ-ը:
Ըստ Ժուկասի՝ տվյալ շտաբային միավորումը, որը կարող է ձեւավորվել «արդեն այս տարի», գտնվելու է անմիջապես ՆԱՏՕ-ի հրամանատարության ներքո: «Հրամանատարական կետի գործառույթները կդառնան համատեղ զորավարժությունների կազմակերպումը Լիտվայում տեղակայված ՆԱՏՕ-ի դաշնակիցների ստորաբաժանումների հետ, ռազմական աշխատանքի կապի պահպանումը ազգային շտաբերի եւ դաշինքի հրամանատարական շտաբերի հետ», - նշել է լիտվացի գեներալը: