Հայաստանի հանրային հեռուստատեսությունում այլեւս սերիալներ չկան: Այս մասին, այսօր՝ հոկտեմբերի 1-ին, լրագրողների հետ զրույցում նշել է Հայաստանի հանրային հեռուստատեսության գործադիր տնօրեն Մարգարիտա Գրիգորյանը: Նա ընդգծել է, որ 100 եւ ավելի մասերից կազմված սերիալները փոխարինել են 10-15 մասից բաղկացած հեռուստաֆիլմերով, որոնք նկարահանվում են պետպատվերով:
Դրանց շարքում նա նշել է ԱԻՆ-ի եւ «Շտապօգնության» աշխատանքի մասին հեռուստաֆիլմերը: «Նախկինում մենք ունենում էինք 4 սերիալ, որոնք կրկնվում էին 5-ական անգամ, հիմա դրանք չկան»,-ասել է նա:
Սկսվել են «Մեր գյուղը» ցիկլի նկարահանումները, որը պատմում է մարզերում կյանքի մասին: Մեկ ամբողջական սյուժե արդեն նկարահանվել է Հովհաննես Թումանյանի հայրենիքի՝ Դսեղի մասին:
«Նախկինում նման սյուժեներ չունեինք: Պարզվում է, դրանց սպասում են: Այդ ֆիլմի համար մենք ավելի քան հազար արձագանք ենք ստացել եւ հիմա ֆինանսավորում ենք փնտրում նկարահանումները շարունակելու համար: Խոսում ենք նաեւ Ջավախքի ու Արցախի մասին հաղորդումների մասին»,-ասել է Գրիգորյանը:
