Թուրքիայի ներսում ցանկացած լուրջ խնդիր դրական ազդեցություն է ունենում Հայոց ցեղասպանության ճանաչման տեսակետից: Այդ մասին այսօր՝ հոկտեմբերի 11-ին, մամուլի ասուլիսի ժամանակ հայտարարեց թուրքագետ Գեւորգ Պետրոսյանը՝ հստակեցնելով, որ այդ դեպքում թուրքական պետությունը իր ռեսուրսները կենտրոնացնում է այդ հարցերի, այլ ոչ թե Ցեղասպանության ճանաչման դեմ գործողությունների վրա:
Նրա խոսքով՝ քրդերը շահագործում են Հայոց ցեղասպանության թեման, սակայն դա այն հարցը չէ, որով կարելի է Թուրքիայի «ողնաշարը կոտրել»: «Եվ ընդհանրապես, Հայոց ցեղասպանության հարցը Թուրքիայի համար առաջնահերթություն չէ, վերջինս ավելի կարեւոր խնդիրներ ունի: Օրինակ, քրդական հարցը թուրքական պետության գլխավոր խնդիրն է», - նշեց Գեւորգ Պետրոսյանը՝ հիշեցնելով նաեւ Կիպրոսի, Իրաքի եւ Սիրիայի հետ ունեցած խնդիրների մասին:
Անդրադառնալով երկրում հայ համայնքի գոյության մասին՝ թուրքագետն ընդգծեց, որ Անկարային հայ համայնքն անհրաժեշտ է սեփական իմիջի համար: «Հայկական համայնքը Թուրքիայի համար վտանգ չի ներկայացնում, բացի այդ այն ներգրավված է գործունեության տարբեր ոլորտներում», - հավելեց Գեւորգ Պետրոսյանը: