Հաշվի առնելով, որ ներկայում Իրանը Մերձավոր Արեւելքի կայունության միակ կենտրոնն է, Արեւմուտքն ինքը կցանկանա որոշակի զիջումների գնալ եւ Թեհրանի հետ համաձայնություն ձեռք բերել: Այս մասին NEWS.am-ի թղթակցի հետ զրույցում հայտարարեց իրանագետ Վարդան Ոսկանյանը:
Նրա խոսքով, Իրանի եւ «վեցյակի» (ՄԱԿ-ի Անվտանգության Խորհրդի մշտական 5 անդամներ Ռուսաստանը, ԱՄՆ-ն, Ֆրանսիան, Մեծ Բրիտանիան, Չինաստանը, ինչպես նաեւ Գերմանիան) բանակցություններում որոշակի առաջընթաց կարձանագրվի:
«Բայց գործընթացը բավական դանդաղ է առաջ շարժվում, չնայած՝ դրական միտումներով: Այդ տեսանկյունից, եթե հաշվի առնենք, որ ներկայում Մերձավոր Արեւելքում տիրող քաոսի ֆոնին Իրանը մնացել է կայունության միակ կենտրոնը, կարծում եմ, Արեւմուտքն ինքը կցանկանա որոշակի զիջումների գնալ եւ համաձայնության հասնել Իրանի հետ»,- ընդգծեց Ոսկանյանը՝ հավելելով, սակայն, որ վերջնական արդյունքների մասին կարող է ասել միայն բանակցությունների մանրամասներին տեղյակ անձը:
Հիշեցնենք, որ հոկտեմբերի 16-ին ավարտվեց «վեցյակի» եւ Իրանի միջեւ «միջուկային բանակցությունների» հերթական փուլը: Մի շարք հարցերի շուրջ կողմերը կարողացան մոտեցնել դիրքորոշումները: Իրանի ԱԳ նախարար Ջավադ Զարիֆի խոսքով՝ կողմերը շահագրգռված են, որպեսզի փաստաթուղթը համաձայնեցնեն նախապես համաձայնեցված ժամկետում՝ մինչեւ նոյեմբերի 24-ը: Բանակցային գործընթացի երկարաձգման մասին խոսք այլեւս չի գնում:
2013 թվականի նոյեմբերին Իրանն ու «վեցյակը» Ժնեւում պայմանավորվեցին մինչեւ 2014 թվականի հուլիսի 20-ը համաձայնեցնել մի փաստաթուղթ, որը կերաշխավորի Իրանի միջուկային ծրագրի բացառապես խաղաղ բնույթը՝ Իսլամական պետության դեմ միջազգային պատժամիջոցները չեղյալ հայտարարելու փոխարեն: Այնուհետեւ ժամկետը երկարաձգվեց մինչեւ նոյեմբերի 24-ը: